Eskom-verhoging gaan munisipaliteite laat ly

2013-01-30 18:01

Johannesburg – Die Suid-Afrikaanse plaaslike regeringsvereniging (Salga) het gewaarsku dat Eskom se voorgestelde tariefverhoging die finansiële ineenstorting van baie munisipaliteite kan veroorsaak, berig Eyewitness News.

Salga het dié voorstelling by die Nasionale Energiereguleerder (Nersa) se openbare verhore, wat in Midrand gehou word, gemaak.

Eskom het versoek dat die prys van elektrisiteit oor die volgende vyf jaar met 'n gemiddeld van 16% styg.

Subesh Pillay van Salga het gesê munisipaliteite sukkel reeds om sy inkomste by verbruikers in te vorder.

Hy het gesê die voorgestelde verhoging sal geweldige druk op munisipaliteite plaas.

Pillay het ook gewaarsku dat die verhoging maatskaplike onrus kan veroorsaak.

Brian Dames, hoof- uitvoerende beampte, het gesê 'n balans moet gevind word tussen die verskaffing van elektrisiteit en die finansiële volhoubaarheid van Eskom.

Hy het gesê die tarief moet in die behoeftes van die bedryf en verbruikers voorsien.

– Volg Nuus24 op Twitter