Eskom 'luister fyn' na SA

2013-01-21 13:48

Johannesburg – Die kragreus Eskom het Maandag gesê hy luister fyn na die openbare verhore oor sy voorgestelde tariefverhogings, berig Eyewitness News.

Die maatskappy vra 'n jaarlikse tariefverhoging van 16% vir die volgende vyf jaar.

Hilary Joffe, woordvoerder van Eskom, het gesê hulle luister na wat die publiek te sê het.

"Ons het ons somme gedoen.

"Ons glo dit is moeilik om te verseker dat die land genoeg elektrisiteit het om 'n suksesvolle ekonomie te ondersteun, maar terselfdertyd moet ons die behoefte van die ekonomie en veral die armes in ag neem."

Intussen het sy Eskom se besluit verdedig om miljoene rande te spandeer om 'n reeks sake-ontbyte, wat deur The New Age-koerant aangebied is, te borg.

"Ons het 'n uitgebreide program om met ons aandeelhouers regoor die land te kommunikeer en ons sal die geleenthede benut om so te doen. Ons doen die ontbyte as deel hiervan."

Joffe het gesê dit is 'n goeie bemarkingsgeleentheid om die kragreus se handelsmerk uit te brei.

– Volg Nuus24 op Twitter