Duisende werkers staak by Marikana-myn

2013-03-05 12:58

Johannesburg – Sowat 6 000 werkers by Lonmin se Marikana-myn het Dinsdag met 'n onwettige staking begin, het die maatskappy gesê.

Dit is dieselfde myn waar 34 werkers in Augustus verlede jaar deur die polisie doodgeskiet is, berig Reuters.

"Dit is die grootste aantal mense wat weier om ondergronds te gaan sedert die einde van die staking in Augustus. Dit is onwettig," het Mark Munroe, Lonmin se hoof van mynwese, gesê.

Lonmin het gesê die mynwerkers wat staak word verbind met die vakbond Amcu, wat eis dat die kantore van die National Union of Mineworkers sluit omdat hy nie meer die meerderheid van die werkers verteenwoordig nie.

Die maatskappy se aandeleprys het na dié nuus met meer as 1% gedaal.

– Volg Nuus24 op Twitter

- Reuters