Duisende van Harmony wag op werk

2013-01-07 10:33

Johannesburg. – Sowat 5 000 werkers by Harmony se Kusasalethu-myn wag steeds tevergeefs om hul werk te hervat, het Sake24 berig.

Werkers wag sedert Donderdag om te hoor wanneer hulle na die werk kan terugkeer, ná Harmony besluit het om die myn se finansiële en operasionele vooruitsigte te hersien in die nadraai van ’n onbeskermde staking en ondergrondse besetting van die myn wat eers op 21 Desember beëindig is.

Werkers kon nog nie terugkeer ná die myn vir die Kers- en Nuwejaarsonderbreking gesluit is nie.

Harmony sê hy het die vakbonde en werkers in die vakansie laat weet dat hy “die finansiële en bedryfstatus” van die myn heroorweeg voordat hy Kusasalethu heropen.

Honderde werkers daag egter sedert Donderdag by die myn op om te werk, maar word nie op die perseel toegelaat nie.

Werkers is aangesê om huis toe te gaan en daar vir opdragte te wag. Hulle sal in die wagtydperk hulle basiese lone betaal word.

– Lees hier meer.

– Volg Nuus24 op Twitter.