Drie vakbonde onttrek hul aan stakings

2012-10-09 13:35

Johannesburg – Die eerste vakbonde het besluit dat hulle nie meer deel van die landwye vervoerstaking gaan wees nie.

RSG berig die Padvragvereniging het aangekondig dat drie kleiner vakbonde – die RFA, die MTWU en die PTWU – Dinsdagoggend by die vergadering van die Kommissie vir Versoening, Bemiddeling en Arbitrasie aangedui het dat hulle Woensdag sal terugkeer werk toe.

Dié vakbonde sê hulle en die werkgewer het oor kwessies ooreengekom en arbeidsoptrede is nie meer nodig nie.

Die drie vakbonde het saam sowat 15 000 lede teenoor Satawu se sowat 30 000 lede.

Onderhandelings met die ander vakbonde wat by die staking betrokke is, gaan voort.

Volg Nuus24 op Twitter