Cosatu wil ekonomie 'tot stilstand ruk'

2012-12-07 10:04

Johannesburg – Cosatu het by die protesoptog teen die implementering van die omstrede e-tolstelsel gewaarsku dat dié betoging slegs die begin is van wat hy vir volgende jaar beplan.

Jacaranda FM berig die vakverbond het gesê hy sal die ekonomie "tot stilstand ruk" en self méér chaos tydens die oggend se spitsverkeer veroorsaak.

Donderdag se betoging is as 'n reuse-sukses beskryf, met verskeie hoofweë wat tot stilstand gebring is. Volgens berigte het sommige motoriste teen 20 km/h op die snelweë gery.

Motoriste het gesukkel om by hul bestemmings uit te kom, maar die metropolisie sê die betoging het vreedsaam verloop.

Sapa het vroeër berig Cosatu het verlede week gedreig om die provinsie se strate te beset, en hoofweë te versper indien die vakverbond nie positiewe terugvoer op memorandums wat aan talle departemente oorhandig is, kry nie.

Volg Nuus24 op Twitter