Barclays, Absa wil saamsmelt

2012-08-21 11:35

Johannesburg – Die bankinstellings Barclays en sy filiaal Absa oorweeg dit om saam te smelt en as een bank in Afrika te funksioneer.

“Hierdie sal na verwagting die saamsmelting van Barclays se belange in Botswana, Ghana, Kenia, Tanzanië, Uganda, Zambië en die Indiese Oseaan met Absa behels...” het die twee banke in ‘n verklaring gesê.

Luidens die verklaring sal Barclays Bank PLC as die meerderheidsaandeelhouer van die gekombineerde Afrika-bedrywigheid aanbly.

“Die lys van Barclays se filiale in Kenia, op die Nairobi-sekuriteitebeurs, en in Botswana, op die Botswana-aandelebeurs, sal gehandhaaf word.”

Slegs Barclays se maatskappye in dié filiale sal by die voorgestelde samesmelting ingesluit word.

Die twee banke sê daar is “geen sekerheid” dat dié besprekings tot ‘n samesmelting sal lei nie.

“Die voorgestelde samesmelting sal nie verwag word om teen 2013 voltooid te wees nie.”

Volg Nuus24 op Twitter  

- SAPA