Twee All Blacks in sop oor drinksessie
2011-10-08 23:00
In-diepte Verslae
Die Internasionale rugbyraad het onthul dat slegs een speler positief getoets het vir 'n verbode middel tydens die Wêreldbeker in Nieu-Seeland.
Die Springbokke se les uit hul sukkelsege oor Wallis is om nie eens ’n sege oor Namibië as vanselfsprekend te aanvaar in die Wêreldbeker-toernooi nie.
Kaapstad – Die All Black-sterre Cory Jane en Israel Dagg het volgens mediaberigte, minder as 72 uur voor Nieu-Seeland se Wêreldbeker-kwarteindwedstryd teen Argentinië, 'n kwaai drinksessie gehad.
Volgens die webtuiste nzherald.co.nz was Jane en sy beseerde spanmaat Dagg Donderdag by die Mac's Brewbar in Takapuna.
Jane het glo ook 'n sigaret in die kroeg aangesteek, rokery in kroeë word reeds sedert 2004 in Nieu-Seelandse kuierplekke verbied.
Toe die polisie vir 'n verpligte inspeksie opdaag, iets wat algemeen is in Takapuna, het personeel die spelers in die kombuis versteek. Geskokte bystanders sê die twee spelers "was onvas op hul bene" en het nie "baie duidelik gepraat nie".
Jane het na bewering 'n bondel $50-note rondgeswaai en aangebied om vir almal in die kroeg drankies te koop. Hy het glo ook agter die kroeg gaan staan en gemaak asof hy vir homself 'n drankie wil skink.
Twee ooggetuies wat Sondag (Nieu-Seeland tyd) met die Herald gepraat het, het gesê die spelers het die kroeg omstreeks 22:45 Donderdagaand binnegekom.
"Israel Dagg het met ons kom gesels, maar hy was beslis onvas op sy bene. Dit was nie asof hy enige tyd sou omval nie, maar hy was definitief onder die invloed."
Die All Blacks se spanbestuurder, Darren Shand, was duidelik ontsteld oor die bewerings.
"Hulle is die ouens wat die nagevolge sal moet dra, want hulle gaan bekendstaan – veral in hierdie land – as die spelers wat hul span in die steek gelaat het," het Shand gesê.
Maar hy het bygevoeg dat die span die kwessie reeds intern afgehandel het en dat die spelers volgens spanreëls gedissiplineer is.
"Ons het geen reëls vir spelers wat rook of drink nie, maar verwag steeds dat hulle die regte besluite sal maak. Daar is duidelike bewyse dat albei hulself in die steek gelaat het. Cory sal een helse wedstryd moet speel," het Shand bygevoeg.
Die All Blacks skop Sondagoggend om 09:30 SA tyd teen Argentinië op Eden Park af.
Vir die jongste sportnuus volg Nuus24Sport op Twitter.
– Sport24
