Rugby-rillers!
2011-09-10 07:11
In-diepte Verslae
Die Internasionale rugbyraad het onthul dat slegs een speler positief getoets het vir 'n verbode middel tydens die Wêreldbeker in Nieu-Seeland.
Die Springbokke se les uit hul sukkelsege oor Wallis is om nie eens ’n sege oor Namibië as vanselfsprekend te aanvaar in die Wêreldbeker-toernooi nie.
Dit hoef geensins so skouspelagtig soos Vrydag se openingseremonie van die Wêreldbeker-rugbytoernooi te wees nie – ’n sege, hoe lelik ook al, sal vir Suid-Afrika deug in Sondag se groepwedstryd teen Wallis.
“Ons het vier jaar hiervoor gebou,” het die Springbok-afrigter, Peter de Villiers, gister in die aanloop na Springbok-rugby se oomblik van waarheid in die Wellington Regional-stadion gesê.
“Die druk is op die Bokke en dit sal ook altyd die geval wees. As jy kyk na wat ons reeds in wêreldrugby bereik het, sal die verwagtinge baie hoog wees.
“Daar is ’n bevolking van meer as 40 miljoen mense wat op ons staatmaak om die beker huis toe te bring en die land te verenig. Jy kan nie sulke druk systap nie. Ons geniet dit, want dit haal die beste uit ons en hou die span op sy tone.”
Wallis self is onder druk om die daad by besonder baie woorde te voeg. Sy afrigter, Warren Gatland, was sedert sy aankoms in Nieu-Seeland uitgesproke en het selfs so ver gegaan as om oor die Bokke se speelstyl te sê dat hulle “nie enige rugby speel nie”.
Die kans is ook daar dat dit op ’n yslike stryd van die voorspelers en skakelpare gaan neerkom, want die weervoorspelling dui op reën. Daar kan boonop ’n windjie wees om die stelskoppers se taak te bemoeilik.
“Reën is deel van die spel. Dit is een van daardie dinge wat jy nie kan beheer nie. Die sleutel lê in hoe jy daarop reageer, en dís vir ons belangrik. Ons moet só reageer dat ons energie daaruit put,” het die breier gesê.
De Villiers het toegegee dat die Bokke se eerste wedstryd van yslike belang is. Die span wat tweede in die groep eindig, gaan waarskynlik ’n kwarteindstryd teen Australië moet speel en die wenner teen Ierland.
Ondanks die feit dat etlike kenners meen dié wedstryd gaan die wenner van Groep D bepaal, het Samoa en Fidji al in vorige WB-toernooie daarin geslaag om Wallis te klop.
“Jou eerste wedstryd in enige toernooi is belangrik, want dit sal bepaal hoeveel energie jy daaruit put. Dit kom daarop neer dat hierdie vir ons ’n yslike wedstryd is. Ons besef hoe belangrik dit is om goed te begin,” het De Villiers gesê.
Hy wil ook nie hê dat sy span enigsins aan die statistieke vasklou dat Suid-Afrika sy laaste 12 wedstryde teen Wallis gewen het nie. “Niks wat in die verlede gebeur het, tel môre nie. Jy kan nie in die verlede vasgevang word nie. Daar iets fout met jou én jou span se karakter indien jy sulke dinge toelaat om jou te beheer.”
De Villiers se spankeuse het geen verrassings opgelewer nie. Sy uitsprake in die aanloop na die wedstryd het altyd daarop gedui dat die kaptein, John Smit, bo Bismarck du Plessis op haker gekies sal word.
“Dit is nooit malik om ’n span te kies nie. Ek is nie sentimenteel daaroor nie. Jy gaan sit en kyk waarmee die teenstander vorendag gaan kom en werk dan ’n plan uit om hom te stuit.”
Dis die eerste keer dat Suid-Afrika en Wallis mekaar in ’n WB-toernooi die stryd aansê.
– Vir die jongste sportnuus volg Nuus24Sport op Twitter