Oud-All Black: Pocock beste flank by WB
2011-09-08 12:17
In-diepte Verslae
Die Internasionale rugbyraad het onthul dat slegs een speler positief getoets het vir 'n verbode middel tydens die Wêreldbeker in Nieu-Seeland.
Die Springbokke se les uit hul sukkelsege oor Wallis is om nie eens ’n sege oor Namibië as vanselfsprekend te aanvaar in die Wêreldbeker-toernooi nie.
Auckland – Die Wallabies se baljagter David Pocock sê hy voel gevlei om deur een van sy rugbyhelde as die wêreld se beste nr. 7 gereken te word.
Dié bewering wat deur Josh Kronfeld, een van die All Blacks se staatmaker-losvoorspelers in die 1990's gemaak is, het 'n hele paar wenkbroue in rugbymal Nieu-Seeland laat lig.
"'n Goeie nr. 7 kan die span maak of breek," het 'n Britse koerant Kronfeld Woensdag aangehaal.
"Kyk maar na David Pocock. Hy is tans die beste nr. 7 in die wêreld, 'n meester."
Pocock word beskou as een van die Wallabies se grootste wapens by vanjaar se Wêreldbeker-toernooi.
Die 23-jarige, wat in Zimbabwe gebore is, is een van die jongelinge in afrigter Robbie Deans se span sedert hy die leisels in 2008 oorgeneem het.
Pocock sê hy voel geëerd om, deur een van sy rugbyhelde, selfs hoër as die All Black-kaptein Richie McCaw geag te word.
"Josh Kronfeld was 'n legende. Ek onthou hoe ek op laerskool gekyk het hoe hy met daai kopskerm van hom speel," het hy aan joernaliste gesê.
Kronfeld het in 54 toetse vir die All Blacks uitgedraf en sy land by die 1995 en 1999 WB-toernooie verteenwoordig.
"Hy was een van daai ouens wat altyd die vleuels, of dit nou Jonah Lomu was of iemand anders, agterna gesit het. En as hulle naby die kantlyn geduik word en die bal skiet los sou hy dit gryp en 'n drie gaan druk."
Pocock, wat as 'n toekomstige kaptein beskou word, is een van twee Australiërs wat verlede jaar vir die IRR se speler van die jaar genomineer is.
McCaw het dié toekenning gewen.
Vir die jongste sportnuus volg Nuus24Sport op Twitter.
- SAPA