O'Connor en spanmaats in beweerde bakleiery
2011-08-22 14:19
In-diepte Verslae
Die Internasionale rugbyraad het onthul dat slegs een speler positief getoets het vir 'n verbode middel tydens die Wêreldbeker in Nieu-Seeland.
Die Springbokke se les uit hul sukkelsege oor Wallis is om nie eens ’n sege oor Namibië as vanselfsprekend te aanvaar in die Wêreldbeker-toernooi nie.
Sydney – Die Wallabies se drie opwindendste agterlynspelers was na bewering in November verlede jaar betrokke in ’n dronkbakleiery in Parys.
Die drie ster-agterspelers is gewoonlik onafskeidbaar in die Wallaby-kamp, maar dié beweringe kon nie op ’n slegter tyd gekom het vir Robbie Deans se span nie.
Volgens TV-berigte het James O'Connor en die spelskepper-losskakel Quade Cooper ’n paar dae voor die laaste toets van die seisoen teen Frankryk, ’n laataand-onderonsie met hul spanmaat Kurtley Beale gehad.
Die beweerde bakleiery het klaarblyklik nie die Wallabies beïnvloed nie, want hulle het ’n paar dae later die Hane in die Stade Francais met 59-16 pak gegee.
Die Australiese Rugbyunie (ARU) het gesê hy het met ’n ondersoek na die beweringe begin nadat koerante berig het oor ’n voorval in Parys waar alkohol betrokke was.
’n ARU-woordvoerder het gesê al die betrokke partye is ondervra, maar die ondersoek sal Dinsdag voortduur wanneer Deans sy 22-tal vir Saterdag se Drienasies-wedstryd teen die All Blacks bekend maak.
“Ons sal nie spelers op hul name noem nie,” het ’n ARU-woordvoerder aan AP gesê."
“Beweringe van ’n voorval verlede jaar in Parys is deur die media onder ons aandag gebring. Geen klagtes is gelê nie en ons kon nie vasstel of die polisie betrokke was nie.”
TV-nuus het ook beweer Cooper en van sy spanmaats is verbied om te drink ná wangedrag met die aanvang van die toer na Hongkong einde verlede jaar.
O’Connor is Maandag ’n boete van AUS$10,000 (sowat R75 000) en ’n skorsing van een wedstryd opgelê omdat hy Donderdag se span-aankondiging en -foto misgeloop het ná ’n beweerde drinkery in Sydney.
- SAPA