Jonny loof Flood as nr.12
2011-10-07 09:29
In-diepte Verslae
Die Internasionale rugbyraad het onthul dat slegs een speler positief getoets het vir 'n verbode middel tydens die Wêreldbeker in Nieu-Seeland.
Die Springbokke se les uit hul sukkelsege oor Wallis is om nie eens ’n sege oor Namibië as vanselfsprekend te aanvaar in die Wêreldbeker-toernooi nie.
Auckland. – Toby Flood se insluiting as binnesenter om Engeland se spelskepping Saterdag in die kwarteindronde van die Wêreldbeker-toernooi teen Frankryk te verbeter, is deur die losskakel, Jonny Wilkinson, verwelkom.
“Dit bied veelsydigheid sonder om iets van ons eenheid in te boet,” het Wilkinson gesê.
Flood se insluiting in die plek van die beseerde Mike Tindall is een van vier veranderinge aan die span.
Daar is nou nie net ’n beter verspreider van die bal in die middelveld nie, maar ook ’n regtervoet-skopper.
“Jy het nou twee ouens op dieselfde golflengte wat op dieselfde dinge fokus en ’n soortgelyke manier het om probleme uit te sorteer.
“Ons het albei as nommer 10 en nommer 12 gespeel en ons kan aanpas by omstandighede op die veld,” het Wilkinson gesê. “Om Toby daar te hê, is gerusstellend.
“Wanneer ek onder in ’n losskrum vasgepen lê, sal ek weet daar is iemand wat dink soos ’n nr.10 en daardie besluite kan neem.”
Martin Johnson, die Engelse se afrigter, het ’n dilemma gehad weens die twyfel wat oor Tindall se beskikbaarheid bestaan het, maar Flood, hoewel hy ’n heeltemal ander soort speler is, was waarskynlik die beste keuse as plaasvervanger.
Johnson wou ’n speler met meer opsies binne Manu Tuilagi as senter gehad het.
“Vir my is dit ’n opwindende kombinasie,” het Johnson gesê.
Selfs die skrumskakel, Ben Youngs, is opgewonde oor wat Wilkinson en Flood saam kan doen. “Hulle ken mekaar baie goed en sal iets spesiaals aan ons aanvalle gee.”
Met Flood daar, is daar ook meer stelskop-opsies.
“Daar is net twee skoppe wat ek graag sal wil oor hê,” het Wilkinson gesê van sy 11 mislukkings uit 20 pogings. Johnson wou egter nie sê wie sy eerste keuse as stelskopper teen die Franse gaan wees nie.
Die span is:
Ben Foden, Chris Ashton, Manu Tuilagi, Toby Flood, Mark Cueto, Jonny Wilkinson, Ben Youngs, Nick Easter, Lewis Moody (k), Tom Croft, Tom Palmer, Louis Deacon, Dan Cole, Steve Thompson, Matt Stevens. PLAASVERVANGERS: Dylan Hartley, Alex Corbisiero, Courtney Lawes, Simon Shaw, James Haskell, Richard Wigglesworth, Matt Banahan.
Vir die jongste sportnuus volg Nuus24Sport op Twitter.
– Sport24
