Habana gereed vir aanslag
2011-09-29 18:39
In-diepte Verslae
Die Internasionale rugbyraad het onthul dat slegs een speler positief getoets het vir 'n verbode middel tydens die Wêreldbeker in Nieu-Seeland.
Die Springbokke se les uit hul sukkelsege oor Wallis is om nie eens ’n sege oor Namibië as vanselfsprekend te aanvaar in die Wêreldbeker-toernooi nie.
Auckland – Bryan Habana beskou sy enigste vorige toets teen Samoa as spesiaal, maar ook een van die mees fisieke uitdagings wat hy nóg met die Springbokke ervaar het.
Die voormalige IRR-speler van die jaar het vier drieë gedruk in die Springbokke se oorwinning van 59-7 teen Samoa in die groepfase in die 2007-wêreldbekertoernooi.
Habana (28) het by vanjaar se toernooi Suid-Afrika se voorste driedrukker geword met sy 39ste drie in sy 72ste toets. Hy weet die verdedigende kampioene sal voor nóg ‘n fisieke uitdaging te staan kom in Vrydag se wedstryd teen Samoa.
“Dit was baie spesiaal, dit is ook uniek om vier drieë vir jou land te druk,” het Habana Donderdag by ‘n mediakonferensie in Auckland gesê.
“Maar in daardie eerste 20 minute was ek nie regtig daarin geïnteresseerd om met hulle te bots nie, nadat ek gesien het hoe hul agtsteman (Henry Tuilagi) in Danie (Rossouw) en Schalk (Burger) vasgehardloop het.
“Ek dink nie môre (Vrydag) sal veel anders wees nie. Die struktuur waarbinne Samoa nou werk, met heelwat van hul spelers wat in Europese ligas speel, het daartoe gelei dat hulle ‘n veel beter span is as wat hulle in 2007 was.
“Hulle gaan ‘n groot uitdaging vir ons wees – nie net fisiek nie, maar ook met hul strukture.”
“So ons gaan moet seker maak ons speel van ons beste rugby as ons enige kans op oorwinning wil hê.”
Habana, wat Jonah Lomu se vorige toernooirekord van agt drieë by die vorige wêreldbeker verbeter het, het gesê al is die All Blacks die span om te klop, glo die Springbokke hulle kan weer die wêreldbeker wen.
“Daar is ‘n geloof binne die span dat ons beslis hierdie wêreldbeker kan wen,” het Habana gesê.
“Die invloed van buite af is nie werklik belangrik nie, maar eerder die druk wat ons op onsself as ‘n span en individue plaas om goed te speel.
“Die All Blacks het definitief hul stem dik gemaak oor die afgelope paar weke en die res van die wêreld volg hulle op die oomblik.”
- Vir die jongste sportnuus, volg Nuus24Sport op Twitter
- AFP