Gesoute Namibiërs na WB
2011-08-19 08:00
In-diepte Verslae
Die Internasionale rugbyraad het onthul dat slegs een speler positief getoets het vir 'n verbode middel tydens die Wêreldbeker in Nieu-Seeland.
Die Springbokke se les uit hul sukkelsege oor Wallis is om nie eens ’n sege oor Namibië as vanselfsprekend te aanvaar in die Wêreldbeker-toernooi nie.
Pretoria – Met minstens die helfte van sy groep wat gereeld op provinsiale vlak in Suid-Afrika speel en ’n klompie ander wat in Europa geld uit rugby verdien, behoort Namibië se Wêreldbeker-groep nie groot-oog in Nieu-Seeland aan te kom nie.
Só meen Kees Lensing, die kaptein van die Namibiërs se vorige Wêreldbeker-veldtog – in 2007 in Frankryk.
Die gewese loskopstut, wat verlede jaar sy loopbaan by Castres in Frankryk beëindig het, glo dat die gereelde blootstelling aan provinsiale rugby die Namibiërs mededingend sal maak, maar erken dat hulle in ’n baie taai groep speel.
“Om teen vier spanne te speel wat almal in die top-10 in die wêreld kan wees, is ’n baie steil bult vir Namibië.
Daarom gaan die gehalte van die voorbereiding van die span vooraf van deurslaggewende waarde wees,” het Lensing oor die Groep D-wedstryde teen Fidji, Samoa, Suid-Afrika en Wallis gesê.
“Ek dink die 2011-groep sal meer ervaring hê as die een van 2007.
Rugby het egter met minstens vyf persent vorentoe beweeg en ek is nie seker of die 2011-span vyf persent beter is as die een van 2007 nie.”
Die groep, wat Donderdag bekendgemaak is, word dié keer deur die gewese Griekwas- en Blou Bul-flank Jacques Burger aangevoer.
Burger draf tans vir Saracens uit, terwyl Jacques Niewenhuis (Aurillac, Frankryk), Piet van Zyl (Bourgoin, Frankryk), Ryan de la Harpe (Moseley, Engeland) en Eugene Jantjies en McGrath van Wyk (Farul Constanta, Roemenië) ook in die Noordelike Halfrond speel.
Spelers wat plaaslik provinsiale rugby gespeel het, sluit in Danie Dames en Worsie Kotze (Luiperds), Connie Marais (Pumas), Chrysander Botha (Valke), Rohan Kitshoff (Westelike Provinsie), Marius Visser (Grens) en die Bolandse Kavaliers Jané du Toit en Nico Esterhuyze.
Dertien spelers van die 2007-groep is weer gekies.
Administratiewe chaos dreig om die span se veldtog te ontwrig en onderhandelings deur die Namibiese regering om die Hage Geingob-stadion by die Namibiese Rugbyunie te koop om laasgenoemde se groot skuldlas te delg, het misluk.
Die regering het wel aangedui dat hy die span gaan bystaan, maar dat dié geld via ’n trust aan die spelers betaal word en nié deur die NRU hanteer sal word nie.
Namibië se afrigter, Johan Diergaardt, het aan die Republikein gesê dat hy hoogs tevrede is met die samewerking tussen spelers en die tegniese span.
“Ek is beïndruk met die durf en kameraadskap in die kamp. Op die oefenveld gaan die manne voluit en doen wat van hulle verwag word.
Ons sou graag meer oefenwedstryde wou speel, of met strawwer teenstanders kragte meet, maar is gereed vir dit wat die toernooi na ons kant toe gaan gooi.”
Namibië se WB-groep is: Agterspelers: Chrysander Botha, Heini Bock, Danie Dames, Llewellyn Winkler, Connie Marais, McGrath van Wyk, Darryl de la Harpe, Daniel van Wyk, Piet van Zyl, David Philander, Worsie Kotze, Tertius Losper, Ryan de la Harpe, Eugene Jantjies. Voorspelers: Pieter-Jan van Lill, Jacques Nieuwenhuis, Renaud van Neel, Tinus du Plessis, Jacques Burger (k), Rohan Kitshoff, Nico Esterhuyse, Hendrik Franken, Wacca Kazombiaze, Heinz Koll, Raoul Larson, Johnny Redelinghuys, Jané du Toit, Marius Visser, Bertus O’Callaghan, Hugo Horn .
Vir die jongste sportnuus volg Nuus24Sport op Twitter.
– Sport24
