Fidjiane is groot én vinnig
2011-09-17 07:16
In-diepte Verslae
Die Internasionale rugbyraad het onthul dat slegs een speler positief getoets het vir 'n verbode middel tydens die Wêreldbeker in Nieu-Seeland.
Die Springbokke se les uit hul sukkelsege oor Wallis is om nie eens ’n sege oor Namibië as vanselfsprekend te aanvaar in die Wêreldbeker-toernooi nie.
Met hul teenstanders wat ’n swaarder agterlyn het, kan die Springbokke se agterspelers bly wees hulle speel vandag rugby en dat dit nie ’n stoeigeveg is nie.
Die Bokke pak die vlugvoetige en bedrywige Fidjiane vandag in hul tweede Wêreldbeker-wedstryd, en die Bok-agterlyn sal moet wys hulle is ondanks hul ligter gewig nie lig in die broek nie.
Fidji se agterlyn laat die skaal op 665 kg kreun– 42 kg swaarder as die Bokke.
Minder kilogramme is nie die enigste probleem waarmee die Bokke se agterlyn gaan sit nie. Daar sal ook tred gehou moet word met die vaart van die swaargewigte.
Met hul sewes-vaardighede sal die Fidjiane soos ’n weghol-stoomtrein volspoed op die Bokke afgestorm kom.
Die “baba” in die Bok-span, Patrick Lambie (20), wat sy Wêreldbeker-debuut maak, se direkte teenstander op heelagter, Kini Murimurivalu, weeg 98 kg en is 1,84 m lank. Dit is 12kg swaarder as Lambie, wat 86kg weeg en 1,77 m lank is.
Die hele Bok-agterlyn, met die uitsondering van Frans Steyn wat 100kg weeg en 1,91m lank is, is ligter as hul Fidjiaanse teenstanders.
Murimurivalu is saam met die twee vleuels, Napolioni “The Beast” Nalaga (100 kg en 1,91 m) op linkervleuel en Vereniki Goneva (99 kg en 1,89 m) op regtervleuel, ’n swaar en gedugte kombinasie agter.
Die Bokke se agterste drie, wat bestaan uit Lambie, JP Pietersen (86kg en 1,91m) en Odwa Ndungane (85kg en 1,83m), sal voorwaar hul keer moet ken.
Fidji se twee senters, Gaby Lovobulavu (97 kg en 1,76 m) en Seremaia Bai (100 kg en 1,87 m), weeg ook swaarder as Jaque Fourie van die Bokke (96 kg en 1,88m).
Slegs Steyn met sy 100 kg kan met die eilandmanne oor gewig saampraat.
Op 85 kg en 1,79m is Nemia Kenatale, die skrumskakel, die ligste agterspeler in Fidji se span, gevolg deur sy skakelmaat, Waisea Sedre Luveniyali, met 86kg en 1,74 m in lengte.
Hierteenoor weeg die Bokke Fourie du Preez en Morné Steyn onderskeidelik 88kg (1,83m) en 82kg (1,86m).
Die Fidjiane se gewig het hulle egter in die laaste kragmeting teen Suid-Afrika in die Wêreldbekertoernooi in 2007 nie gehelp nie. Pietersen het toe die slot Ifereimi Rawaqa in die linkerhoekie uitgeduik en die Bokke van ’n nederlaag gered.
Vir die jongste sportnuus volg Nuus24Sport op Twitter.
– Sport24
- Die Burger
