All Blacks wens Lomu sterkte toe
2011-09-29 08:26
In-diepte Verslae
Die Internasionale rugbyraad het onthul dat slegs een speler positief getoets het vir 'n verbode middel tydens die Wêreldbeker in Nieu-Seeland.
Die Springbokke se les uit hul sukkelsege oor Wallis is om nie eens ’n sege oor Namibië as vanselfsprekend te aanvaar in die Wêreldbeker-toernooi nie.
Wellington. – Die All Blacks het die legendariese Kiwi-vleuel Jonah Lomu alle sterkte toegewens terwyl hy in ’n hospitaal in Auckland vir ’n nierkwaal behandel word.
Lomu, wat jare reeds aan nefrotiese niersiekte ly en in 2004 ’n nieroorplanting ondergaan het, is Vrydag in die hospitaal opgeneem nadat sy gesondheid glo verswak het.
Meer besonderhede is nog nie bekend gemaak nie, maar plaaslike mediabronne in Nieu-Seeland beweer hy is in ’n bestendige toestand.
Die All Blacks se Wêreldbeker-span het Woensdag ná hul oefening in Wellington spesiaal ’n fotogeleentheid gereël waartydens die span die woorde “Word gou gesond, Jonah – Kia Kaha (wees sterk)” met plakkate uitgespel het.
Die All Black-haker Keven Mealamu het gesê hy het geen verdere inligting oor Lomu se toestand nie, maar het bygevoeg dat die foto bedoel is om “net ’n mooi boodskap van die ouens” aan Lomu te wees.
“Ek dink as mede-All Blacks wil ons maar net hê hy moet gou beter word. Hy verteenwoordig ’n groot deel van ons geskiedenis en eintlik ook ’n groot deel van wat die span vandag is.
“Dit is hartseer om ’n man soos hy te sien soos hy nou is; ons hoop regtig hy word gou gesond.”
Lomu, wat as een van die land se ware rugby-supersterre beskou word, het in 1994 op die ouderdom van 19 die eerste keer in ’n toets vir die All Blacks uitgedraf.
Hy het dit daarna nóg 62 keer gedoen, insluitend verwoestende vertonings in die 1995- en 1999 Wêreldbeker-toernooie.
Sy nierprobleme het eindelik sy loopbaan kortgeknip, hoewel die oorplanting in 2004, met die Nieu-Seelandse radio-omroeper Grant Kereama as skenker, sy gesondheid aansienlik verbeter het.
Hy het daarna selfs vir die Nieu-Seelandse provinsiale span North Harbour gespeel.
Lomu is ook by vanjaar se Wêreldbeker-toernooi as ’n “ambassadeur” betrokke en het op 9 September aan die openingseremonie deelgeneem.
Hy het ook aangekondig dat hy die Warriors-vleuel Manu Vatuvei in ’n boksgeveg vir die liefdadigheidsorganisasie Fight For Life sou aanvat.
Die geveg is vir 3 Desember in Auckland geskeduleer.
Die New Zealand Herald berig Lomu se familie wou voorlopig geen kommentaar lewer nie en dat hulle gevra het dat die media hul privaatheid respekteer.
Vir die jongste sportnuus volg Nuus24Sport op Twitter.
– Sport24