SA se hardste vloekwoord
2010-09-22 07:35
Ag ons almal doen dit seker.
Nee, ek bedoel nie winde laat of rugby kyk of selfs dooswyn drink nie.
Ek bedoel vloek. So nou en dan vloek ons almal seker.
Van die loslippige kletsrymer tot die gospelsanger met die donker verlede. Of dit nou in ons alledaagse gesprekke verskyn, of uitglip wanneer ons ‘n toon teen die bed se poot stamp… Ek laat my nie vertel daar is lippe te heilig vir ‘n ou lelike woordjie nie.
In Suid-Afrika bestaan daar egter die nuwe, sterkste, alomteenwoordige en alles-bepalende vloekwoord. Een woord, bestaande uit drie letters, wat 49 miljoen mense se bloed laat borrel soos ‘n pyn-fontein.
Op skool destyds onthou ek die Groot Vloekwoord. Dit was 'kak'.
Dis waarin ons beland het toe ek en my pel Warren ou Stoffel se motorbande probeer afblaas het. Of toe ons lukwarte by dominee se huis op die hoek gesteel het. Die ‘doom’ het natuurlik nie (hardop) gevloek nie, maar sy seun wat hy gestuur het om ons te jaag en net-net voor die spruit te vang het ons spoegspattend en met ‘n wilde blik in sy oë laat weet: Ons is nou kniediep.
Na skool was dit 'fok' se beurt.
Ja, die universiteit was die verhoog vir hierdie uitdrukking, hierdie werkwoord, hierdie denkrigting. Dit was die antwoord op byna enige akademies-verwante vraag:
'Het jy onthou ons skryf toets?'
'Wat dink jy van die nuwe skrumskakel?'
'Wat gaan jy doen as jy nie graad vang nie?’
In die Apartheidsjare was die Groot Vloekwoord 'hel'.
As jy nie deur Die Kerk of Die Staat met die hel gedreig was nie, het jy tien teen een reeds met een voet in die duiwel se warm kontrei gestaan. Diegene wat nie daarheen op pad sou wees weens hul politieke ingesteldheid nie, was sommer soontoe gery met gekamoefleerde lorries.
Vandag is daar egter 'n hele nuwe vloekwoord.
Een wat warmer brand as as enigiets uit die verlede, en wat met heeltemal te veel emosie gelaai is en jou aan die pikswart bodem van 'n gat kan laat beland.
Dis 'n vloekwoord wat in min plekke op aarde soveel sensasie en konsternasie kan veroorsaak soos in Suid-Afrika. En veral die NUWE Suid-Afrika.
Hierdie woord word misbruik as 'n geleentheid vir oppertunistiese leiers om hul swakhede te verbloem. En dit word 'n verleentheid vir 'n sekere bank wat rugby en politiek wou staan meng.
Dis 'n drieletter-woord wat ons aan die praat kry, en aan die skree hou. Dit is net ‘n woord, ek weet, maar een wat onherroeplike skade verrig, keer op keer. Dit maak van ons anders-wees ‘n afgod en oorskadu enige geloof.
Hierdie allermagtige vloekwoord is natuurlik: Ras.
En die hoeveelheid mag wat hierdie woord dra, ontstel my skoon. Maak my sommer lus om te vloek!
– Peet van Aardt is die nuusredakteur van Nuus24. Volg hom op Twitter.
Stuur jou kommentaar aan Peet
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.