Kan die ANC 'seblief vir Malema opfik!?
2010-03-12 07:58
(Verskoon asb die kru taalgebruik, maar dis tyd vir hard praat)
Die ANC moet net vir Julius Malema opfik.
Nee, dit is nie ‘n spelfout nie. Ek wou nie sê iemand moet hom opfok nie. Geweld is nooit die antwoord nie. As een wat deur Malema as ‘n ‘boer’ beskou word, weier ek om so laag soos hierdie jeugligaleier te daal.
My stelling is ook nie ‘n tikfout nie. Ek wil nie sê die ANC moet Malema opvoed nie. Sy matrieksertifikaat toon die skoolstelsel het hom gefaal. Wat die ongeruimdhede in sy belasting betref, wys dit Jan Taks se reëls maak geen indruk op hom nie. Sy beweerde betrokkenheid by miljioene rande se tenders wat op swak bouwerk uitgeloop het, dui op ‘n afwesige gewete.
Sy uitlating by die Universiteit van Johannesburg vandeesweek dat die boer geskiet moet word omdat hy ‘’n verkragter’ is, getuig van ‘n mens met ‘n donker siel en hart vol haat.
Regtigwaar, sulke mense het ons land nie nodig nie.
Gereeld word daar deur ANC-lede geneul dat die witmense, (of ‘boere’, soos wat Malema na ons verwys) nie wil saamwerk om ‘n nuwe, beter SA te skep nie. En ja, hul het ‘n punt beet – te veel van die ‘boere’ is negatief, wil hulself mobiliseer en sommiges hoop selfs dat belangrike geleenthede soos die Wêreldbeker-toernooi sal faal.
Maar hoe meer daar oproerige, onsensitiewe, idiotiese aanmerkings deur hierdie jeugleier gemaak word, hoe meer gaan die ‘boere’ negatief en selfs aggressief teenoor sy mede-landsburgers raak. Malema moet ons liefs nie almal onder dieselfde kam skeer nie. Hel, hy moet niemand met sulke haatspraak aanraak nie.
Ja, die verlede was verkeerd en daar is steeds armoede en ongeregtigheid. Maar jy, Julius ou maat, is ook deel daarvan en dobbel met die toekoms. So word groot en hou jou bek.
Soveel van ons wil net in Suid-Afrika leef, of dit nou deur swart, wit, pienk of pers regeer word. Die land sit met ‘n jong generasie wat nie daardie soort chip op die skouer dra nie. Maar Malema – hoewel sy ouderdom hom eintlik diskwalifiseer – het ‘n hele pak vol Simba op sy skouer.
Vir sy volgende sportstadion-makietie, kan hy dalk van hierdie chips afskud en aan sy volgelinge uitdeel terwyl hy duur sjampanje sit en drink.
Met sy uitlatings by die Universiteit van Johannesburg trek Malema natuurlik twee ou politieke truuks uit sy mou. Die klassieke ‘rook- en spieëls’-strategie. Met hierdie ‘skiet die boer’-uitspraak, verskuif hy die klem van die tenders- en belastingskandale waarby hy betrek is. Natuurlik sal hy liewer verkies om deur die ‘boere’ gepeper te word as wat Jan Taks of die gereg hom ondersoek.
Tweedens speel hy op sy volgelinge se teerste senuweepunte – die verlede en al die verwyt wat daarmee gepaard gaan. Hy braak net die negatiefste gal want dit is skynbaar soveel makliker as om werklik na oplossings te kyk.
En dit is beslis makliker om aan te val as om verantwoordelik te wees. Veral as niemand jou aan jou verantwoordelikhede herinner nie.
Want ek is bevrees onse president gaan dit nie doen nie. In sy kop, word Zuma te veel 'oor die kole gehaal' en gee hy tien teen een glad nie om dat Malema die ‘boere' op hul plek sit nie. Die ANC gaan niks aan hul waaghalsige grootbek doen nie. Kyk dan hoe haal Winnie vir Madiba uit omdat hy saam met FW – die man wat Mandela in die tronk gegooi het, volgens haar – sy Nobelprys-geleentheid bygewoon het.
Um, Winnie... kry jou geskiedenisfeite reguit. En as die Mandela-van werklik vir jou so groot “Albatros om die nek is”, verloor die tweede naam dan. Dis opportunisties en letterlik lelik naamwegsmyt. Sowaar, die ‘swaard van sedelikheid’ waarmee jy nou jou stekies inkry, is ook maar net ‘n afgesaagde ou stompie.
So wat dan gemaak met Malema? Mens kan slegs wag in die hoop dat hy opgeFik word...
Hiermee verwys ek na Fikile Mbalula.
Dis nou die man wat voor Malema die knuppel by die jeugliga geswaai het, ook alewig met 'n bek vol lewendige ammunisie. Hy, wat tans die adjunk-minister van polisie – en relatief stil is.
Ek onthou hoe afbrekend Mbalula was nie drie, vier jaar gelede nie. Die koerante was net so vol van sy rasende opstokery.
Maar Fikile Mbalula het – tot 'n mate – darem sy politiese jeugskoentjies ontgroei.
Ek hoop dieselfde gebeur met ou lemtong-Malema, dat hy dan ook so opgefik word.
En bliksem, ek bid dit gebeur binnekort want hy is besig om die belowende jong oes van ons land te vernietig.
– Peet van Aardt is nuusredakteur vir Nuus24.com
Stuur jou kommentaar aan Peet
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.