‘n Taai stryd lê voor
2011-02-22 07:35
Na die eerste naweek van die nuwe Super Rugby-reeks kyk rugbykenners met nuwe oë na derby-wedstryde.
Dit het bewys dat derby-wedstryde tussen Nieu-Seelandse spanne die opwindendste is, dat die Suid-Afrikaanse derbies kliphard is en dat die Australiese derbies ietwat vervelig of eensydig is.
Maar ek wil op die Suid-Afrikaanse derbies fokus. Ná Saterdagaand se kragmeting tussen die Bulls en die Lions is die Lions waarskynlik ‘n span om voor uit te kyk dié seisoen. Die manier waarop hulle van 24-5 teruggeveg het, wys hulle gaan beslis nie in 2011 mak kaatjies wees soos verlede jaar die geval was nie. As Elton Jantjies beter pale toe gekorrel het, kon die Lions dalk daadie wedstryd gewen het.
Afrigter John Mitchell was heel duidelik omgekrap met sy span se vertoning in die eerste helfte. Hy’t ná die wedstryd gesê hy stel nie daarin belang om tweede te kom nie. Hy’t bygevoeg dat hulle baie gou hulle sokkies moet optrek as hulle die beste span in die Suid-Afrikaanse groep wil wees.
Hulle kom Saterdag teen die Stormers op Nuweland te staan en die Kapenaars sal ietwat op hulle senuwees wees ná die Lions se poging oor die naweek. Die Lions was veral sterk toe die wedstryd begin los raak het en dis dalk waar die Stormers van die Bulls af kan leer.
Solank die wedstryd redelik gestruktureerd is, is die kanse skraal dat die Lions wegholdrieë sal kan aanteken, so dit beteken die Stormers se voorspelers moet oorheers, met die agterlyn wat in die Lions se 22 losgelaat word.
Peter Grant se rol gaan ook baie belangrik wees as die Stormers die oorhand oor die opposisie wil kry. Hy’s nou weer terug in die Kaap na ‘n tydjie in Japan. Sy taktiese skopwerk sowel as sy skopwerk pale toe moet puik wees, maar ná ‘n hele paar maande in Japan kan ‘n mens nie help om te wonder presies hoe skerp Grant gaan wees nie.
Die verskil tussen die Japanese klub-kompetisie en Super Rugby is hemelsgroot.
Die feit dat dié twee spanne reeds mekaar in ‘n voorseisoen-wedstryd gepak het kan voordelig wees, maar ek’s nie seker vir wie nie. Die een voordeel vir die Stormers is dat hulle nou al Saterdagaand se wedstryd geanaliseer het en dat hulle nou ‘n beter idee van die Lions se sterk en swak punte het; tegelykertyd het die Lions reeds Super Rugby gesmaak, en hulle sal miskien effe skerper as die Stormers wees.
Ek verwag ‘n taai stryd, met die Stormers wat naelskraap gaan wen.
– Morne Esben is die sportaanbieder vir K-FM, Higveld Stereo, 702 Talk Radio en CapeTalk 567. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.