'n Les of twee vir die Bokke
2010-08-03 07:51
As daar twee dinge was wat uitgestaan het in Saterdag se Drienasies-toets tussen die All Blacks en die Wallabies in Melbourne, is dit dat die All Blacks in ‘n liga van hulle eie is en dat skeidsregters vanuit die Suidelike Halfrond Drienasie-toetse moet beheer.
Die feit dat die All Blacks die Wallabies ‘n goeie loesing gegee het maak die Springbokke se verloor effe makliker om te aanvaar, maar ek besef ook dat die Bokke waarskynlik hulle vorige toets teen Australië moes gewen het.
Maar dis water onder die brug.
Terug na die All Blacks.
Die manne van Nieu-Seeland is by verre die beste span in die wereld dié jaar en die kanse lyk goed dat hulle die trofee omhoog sal hou. Maar as ek ‘n All Black-ondersteuner was sou dit my so effe gepla het met die Wêreldbekertoernooi om die draai.
Nes die Proteas word die All Blacks in sekere geledere as “chokers” beskou, en selfs Graham Henry moes Saterdag bieg dat sy span nie ‘n baie goeie rekord in Wêreldbeker-kragmetings het nie.
Henry gee toe dat sy span op die oomblik die pasaangeërs in wereldrugby is, maar waarsku dat baie in elf maande kan gebeur.
Wyse woorde, mnr Henry.
Die skeidsregter in Saterdag se wedstryd, Craig Joubert, het bewys dat skeidsregters van die Suidelike Halfrond eenvoudig in beheer van Drienasie-toetse moet wees. Ja, hy’t wel ‘n paar ongewilde besluite geneem, maar oor die algeheel het die wedstryd mooi gevloei en niemand kan kla dat hy te lief vir sy fluitjie is nie.
Ek dink hy’t die afbreekpunte baie goed hanteer, wat natuurlik in Richie McCaw se guns gespeel het. ‘n Mens kon sien dat beide spanne die naweek baie meer gelukkig met die skeidsregter was.
Sanzar sal dringend hierna moet kyk, want die interpretasie van die reëls tussen die Noordelike en die Suidelike Halfrond verskil steeds te veel.
Suid-Afrikaanse, Australiese en Nieu-Seelandse spelers speel in die Super14 vir tussen 13 en 15 weke met ‘n stel reëls wat op ‘n spesifieke manier geïnterpreteer word, maar word dan aan heeltemal ander interpretasies blootgestel wanneer hulle toetse moet speel.
Ek sal dit verstaan as skeidsregters uit die noorde beheer neem oor die Junie-toetse of op die toer van die VK, maar in ‘n hoë-profiel toernooi soos die Drienasies moet skeidsregters van die Suidelike Halfrond gebruik word.
In daardie sin gaan dinge nie beter word vir die Bokke nie – nog ‘n paar skeidsregters van die noorde sal hulle laaste drie toetse beheer en die beste sal wees om eenvoudig net beter by hulle interpretasie aan te pas.
– Morné Esben is die sportaanbieder vir K-FM, Higveld Stereo, 702 Talk Radio en CapeTalk 567. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.