Wat is fout met Habana?
2011-03-16 09:36
Die na-wedstrydse mediakonferensie ná die Stormers se 18-6 sege oor die Highlanders Vrydagaand het vir die eerste keer nogal woes geraak.
Dis gewoonlik redelik ordelik en kort, maar op daardie aand was dit heeltemal anders. En die rede daarvoor... Bryan Habana!
Habana was nie persoonlik in die mediakonferensie nie, maar daar is heelwat oor hom en sy huidige spelpeil gepraat. Dit was duidelik dat afrigter Allister Coetzee redelik omgekrap was oor die vrae en het so half sy gewone kalmheid verloor.
Volgens een joernalis sou dit miskien beter vir Habana wees om ‘n paar Vodacom-beker-wedstryde vir die WP te speel om weer te voel hoe dit is om drieë te druk. Coetzee het natuurlik sy vleuel beskerm deur te sê hy’s gelukkig met Habana se werksverrigting en dat hy hom steeds sal gebruik.
Dis natuurlik deel van ‘n afrigter se werk om sy spelers te beskerm, maar Habana maak dit beslis nie maklik nie.
Alhoewel hy vir werk gaan soek, ly sy basiese spel daaronder. Sy verdediging is ‘n probleem omdat hy baie keer uit sy verdedigingslyn opbeweeg, en as gevolg daarvan mis hy baie duikslae. Dit was veral deur die All Blacks en die Wallabies tydens verlede jaar se Drienasies-toernooi uitgebuit. Sy algemene foute gedurende wedstryde raak ook nou baie.
Dis nie asof hy nie die bal kry nie. Met spelers soos Jean de Villiers, Juan de Jongh en Jaque Fourie aan sy binnekant, kry hy meer as genoeg bal maar dit lyk net asof hy nie lekker weet wat om daarmee te doen nie. Dit lyk ook asof hy sy selfvertroue kwyt is.
Dis half moeilik om uit te lig presies waar Habana se fout lê. Miskien probeer hy net te hard, of miskien pas hy net nie by die Stormers in nie. Miskien het hy min motivering aangesien hy reeds alles in rugby bereik het.
Daar moet bepaal word wat hom aanvanklik by die Bulls so goed gemaak het. Miskien was sy hardloop-tegniek ‘n bietjie verskillend van hoe dit nou is of miskien was hy net meer “honger” vir sukses toe hy in Pretoria was. Wat dit ookal is, moet daar lank en hard na Habana gekyk word om presies vas te stel hoekom hy nou net ‘n skaduwee van sy ou self is.
Habana gaan nie vir altyd met sulke lae gehalte spel wegkom nie, en indien dit wel aanhou gaan dit net ‘n kwessie van tyd wees voordat hy die bank vir die Stormers en die Bokke gaan warm maak.
– Morné Esben is die sportaanbieder vir K-FM, Higveld Stereo, 702 Talk Radio en CapeTalk 567. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.