Spanne wen party, verloor party
2011-03-08 07:52
Ek lees die week met groot teleurstelling Suid-Afrikaners se kommentaar oor die Proteas se verloor-wedstryd teen Engeland Sondag. Die woorde “choke”, “chokers” en “wedstrydknoeiery” staan uit en ek het besef presies hoe wispelturig en onpatrioties Suid-Afrikaners regtig is.
Ek sal die eerste wees om saam te stem dat die wedstryd ‘n bitter smaak in my mond gelaat het, maar om te sê hulle het ge-choke is onregverdig.
Nadat hulle die goeie werk gedoen het om Engeland vir net oor die 170 uit te boul, kon hulle nie genoeg lopies aanteken om die knoop deur te haak nie. Het die blad erger geword om op te kolf soos die dag gevorder het, of was Suid-Afrika eenvoudig deur ‘n beter span geklop?
Volgens my was beide 'n faktor.
Hulle het nie ge-choke nie, maar hulle het wel sleg gespeel en die wedstryd verloor. Dis wat gebeur in sport: spanne wen en hulle verloor. ‘n Mens kan dan net sowel sê die Bulls het oor die naweek teen die Highlanders ge-choke of Manchester United het teen Liverpool ge-choke.
Skrik wakker mense, die Proteas het ‘n wedstryd verloor, maar hulle is steeds in die wêreldbeker.
Dis tyd dat ons Suid-Afrikers 'n bietjie agter ons sporthelde staan, en die wat hulle nie wil ondersteun nie, kyk dan iets anders en hou eerder julle monde as om oningeligte kommentaar te lewer.
Pleks van om Graeme Smith, Jacques Kallis en kie te kritiseer, ondersteun hulle. Hulle doen dit vir óns, die mense van Suid-Afrika. As hulle die toernooi moet wen, sal hulle as helde terugverwelkom word en ons almal wil tog daarvan deel wees.
As ons kyk na die feite van die wedstryd het die kolfblad ‘n baie groot rol gespeel. Een van die kommentators voor die wedstryd het dit as ‘n dag-vier-toetsblad beskryf. Dit was bruin en krummelrig en die wip was vreeslig onegalig.
Net drie kolwers het gemaklik op daardie blad gelyk – Jonathan Trott, Ravi Bopara en Hashim Amla. Hulle is ook seker drie van die geduldigste kolwers tans in wêreldkrieket. Die res van die spelers het natuurlik gedink dis ‘n blad wat weer meer as 300 lopies per beurt sal oplewer en het as gevolg daarvan met ‘n baie meer aggresiewe houding na die middel gestap.
Ek dink ons het ook gesien dat daar ‘n nood is vir ‘n wedstryd-wenner soos ‘n Mark Boucher of ‘n Albie Morkel, wie vinning lopies naby die einde van ‘n kolfbeurt kan aanteken. Hulle is ongelukkig nie in Indië nie, so Corrie van Zyl sal moet kopkrap oor die balans van sy span vir die wedstryd teen die gasheerspan die naweek.
Ek dink Johan Botha moet Morné van Wyk vervang.
Van Wyk is ‘n spesialis-kolwer en moet veel hoër in die kolforde inkom om effektief te wees. Dieselfde geld vir Colin Ingram.
Die beginspan moet basies dieselfde wees as die een wat met die Wes-Indiese Eilande afgereken het.
Ek verstaan dis moeilik vir Suid-Afrikaners om ‘n verloor in enige sport te hanteer, maar ons sal baie vinning moet leer om ons spanne deur dik en dun by te staan. Ons sal nie altyd met spankeuses, taktiek ens. saamstem nie, maar om die spelers, kaptein en afrigter te kritiseer gaan niks regstel nie.
Kom ons aanvaar die verloor as dit kom, maar laat ons ook die seges geniet wanneer ons manne wen. Ons wen in elk geval meer as wat ons verloor.
– Morne Esben is die sportaanbieder vir K-FM, Higveld Stereo, 702 Talk Radio en CapeTalk 567. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.