So kan die Curriebeker-semi's beslis word
2010-10-05 07:57
Saterdag se Curriebeker-kragmeting tussen die WP en die Haaie kan moontlik ‘n toets-lopie vir die halfeindstryd wees.
As die Haaie – soos verwag is – die Streeptruie op Nuweland klop, sal hulle dan ‘n halfeindstryd teen die Kapenaars verseker. Die Cheetahs en die Blou Bulle sal ook dan hulle laaste wedstryde teen onderskeidelik die Luiperds en Griekwas moet wen om die WP op die punteleer verby te kan steek.
Daar’s ‘n sterk moontlikheid dat dit sal gebeur, en die Leeus bid beslis dat die Vrystaters of Pretorianers sal vasval.
Dan sal die Haaie tuis speel teen die WP in die een halfeindstryd met die Cheetahs en die Bulle wat dinge waarskynlik in Bloemfontein moet uitspook.
Maar op die oomblik is niks verseker nie, wat hierdie naweek se aksie so opwindend maak.
Daar’s nogal baie faktore – anders as die eindtellings – wat die halfeindstryde kan bepaal. Byvoorbeeld: gaan die Haaie die Bulle se voorbeeld van die Super14 volg toe hulle ‘n “B-span” Kaap toe gestuur het om die WP aan te durf? Ek’s nie 100 persent seker hulle sal daardie kans waag nie. Hulle sal waarskynlik hulle beste span afstuur om volpunte teen die WP te probeer kry en sodoende ‘n herhaling in Durban volgende week af te dwing.
Die Natallers sal beslis ‘n halfeindstryd teen die Bulle wil vermy, want laasgenoemde sal vir Victor Matfield en kie terug hê en ons almal weet daai ouens weet hoe om uitklop-rugby te speel.
Goeie nuus vir die WP is dat hulle ook die res van hulle Springbokke terugkry en dit sal die Haaie se taak om op Nuweland te wen, so effe moeiliker maak. Verdere goeie nuus is dat – indien die WP wen – hulle dan ‘n tuis halfeindstryd teen die Cheetahs sal hê. Die kanse is baie beter dat ‘n WP-span wat op volle silinders hardloop, die Cheetahs op Nuweland ore kan aansit as wat dit sal wees om die Haaie in Durban te stamp.
Die Streeptruie kon natuurlik in ‘n baie beter posisie gewees het as hulle die Bulle verlede naweek op Loftus geklop het. Hulle het beter as die tuisspan gelyk en moes hulle voorsprong beter bewaar het. Daar bestaan ook nou vrae oor hulle verdedigingspatroon wat op ‘n tyd rotsvas was. Dit lyk asof ‘n aanvallende span ‘n goeie kans het om gate in die verdedigingslinie oop te breek en die Haaie sou dit opgelet het.
Ongeag van hoe dinge die naweek gaan uitspeel, is ons verseker van twee dinge: hoë gehalte rugby en die Bokke terug in hul provinsiale kleure.
– Morné Esben is die sportaanbieder vir K-FM, Higveld Stereo, 702 Talk Radio en CapeTalk 567. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.