Sharks, Stormers gee die pas aan
2013-02-01 08:14
Die naweek sal ek seker weer in die moeilikheid by vroulief wees omdat daar weer groot rugby op die kassie is.
Die Lions gaan aan Saru se grootbase wil wys watter groot flater hulle begaan het deur beloftes te maak wat hulle nie kon nakom nie, wanneer hulle teen 'n jong Bulls-span te staan kom.
Natuurlik gaan die twee spanne die wedstryd met baie verskillende doele benader. Die Lions wil hul derde agtereenvolgende wedstryd in 2013 wen terwyl Frans Ludeke sy span se diepte wil toets voordat die toernooi in alle erns begin.
Deon Stegmann gaan 'n vreeslike onervare span op die veld lei, maar ondanks die gebrek aan ervaring sal hulle gedugte opponente vir die Lions wees.
Die ander wedstryd van belang gaan die kragmeting in Bloemfontein wees waar die Stormers die Cheetahs pak. Allister Coetzee het ook 'n eksperimentele span gekies vir die wedstryd, hoofsaaklik omdat sy ervare spelers steeds met klein beserings sukkel. Jean De Villiers, Schalk Burger, Tiaan Liebenberg, Elton Jantjies, Rynhardt Elstadt en Siya Kolisi is maar net van die spelers wat nie in vir die naweek oorweeg is nie.
Peter Grant sal ook waarskynlik die Superrugby-openingswedstryd teen die Bulls op Loftus misloop weens sy verantwoordelikheid teenoor sy Japanese klub.
Maar daar is steeds groot slaankrag in die Stormers se beginspan. Gio Aplon, Bryan Habana, Juan de Jongh, Jaco Taute en Duane Vermeulen sal seker maak dat die Kapenaars groot vrae van die Cheetahs se verdediging sal vra.
Vir my is die Stormers en die Sharks die twee voorlopers in die Suid-Afrikaanse konferensie. Ek dink die Sharks, met al hul Springbokke, gaan moeilik wees om in Durban te stuit en met die aanwins van Frans Steyn, lyk hulle middeveld nou weer stewig.
Die Sharks is waarskynlik die Stormers se grootste bedreiging vir die titel van Suid-Afrika se beste Superrugby-span, 'n titel wat die Stormers oor die afgelope twee jaar gehou het. Die span van Durban het verlede jaar 47 drieë gedruk en 31 afgestaan, wat bewys dat hulle ewe goed op verdediging as op die aanval is. Die Stormers kon verlede jaar slegs 28 drieë druk, maar het 'n ongelooflike 21 drieë afgestaan.
Ja nee, Superrugby is om die draai en ek lek nou al my lippe af vir al die opwindende aksie!
– Morné Esben is ’n nuusleser vir 94.5 Kfm. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
