Ras steeds ‘n probleem vir sekere ondersteuners
2011-03-29 08:14
Ek het 'n paar weke gelede in een van my rubrieke gepraat van hoe wispelturig Suid-Afrikaners oor sport is.
As ek dit nie mis het nie, was dit nadat die Proteas teen Engeland verloor het.
Hoe dit ookal sy, daardie wispelturigheid het dié week op 'n lelike manier na vore gekom. 'n Sekere Paul van Rosebank het ingebel om sy mening oor die Proteas te gee.
Aan die begin was sy siening dat die Proteas sielkundig nie sterk genoeg was om 'n uitspeel-wedstryd te wen nie en dat hy nie juis verbaas is oor hoe hulle teen Nieu-Seeland gevaar het nie.
Hy't ook bygevoeg dat die Proteas miskien die Black Caps onderskat het.
Dit was te verstane. Hy, soos vele ander Suid-Afrikaners, is kwaad oor hoe die nasionale span hulself in die voet geskiet het. Dit verstaan ek, maar wat daarna uit sy mond gekom het, het my verstand te bowe gegaan.
Hy't toe gevra hoekom ons hierdie "losers" vereer en dat hulle 'n klomp mamparras is! Hy't ook gesê dat hy oor die wolke is dat die Proteas nie meer in die wêreldbeker is nie en dat hy elke oggend met hierdie gevoel wakker wil word.
Teen dié tyd was ek briesend, want ek kon nie glo dat daar sulke onbeskofte, bitter en negatiewe Suid-Afrikaners in die land is nie, nog minder in dieselfde stad as ek.
Die ergste was toe hy gevra het hoekom kleurlingmense hierdie groep spelers vereer en wat hulle ooit vir kleurlingmense gedoen het. Van wat ek kon aflui, is hy self ‘n kleurling en ‘n Suid-Afrikaner.
Hy't afgesluit deur te sê dat hy Afrikaanssprekende Suid-Afrikaners met sy hele hart verag.
Soos u kan verstaan, was ons heeltemal stom deur wat hierdie man te sê gehad het en dat hy moontlik ander mense met sy gedagtes beïnvloed het.
Ja mense, ek verstaan, die Proteas het ons teleurgestel en ons het die reg om kwaad te wees maar om daardeur mense van 'n verskillende rasgroep aan te val vat dit ‘n bietjie te ver en om eerlik te wees is daar nie plek vir sulke mense in Suid-Afrika nie.
Ongelukkig, ongeag van al die goeie dinge in hierdie land en al die positiewe stappe vorentoe wat ons as die burgers van die land geneem het, is daar steeds mense soos Paul van Rosebank wat bewys dat 'n minderheid in Suid-Afrika ronddwaal wat glad nie verander het nie.
Dis jammer.
– Morné Esben is die sportaanbieder vir K-FM, Higveld Stereo, 702 Talk Radio en CapeTalk 567. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.