Proteas en Indië lek lippe vir slag van Centurion
2010-12-14 13:56
Die reeks om die As tussen Australië en Engeland word wêreldwyd as die grootste toetsreeks beskou, hoofsaaklik omdat beide spanne so na aan mekaar is in terme van talent. Maar die opkomende reeks tussen die Proteas en Indië – indien dit uitspeel soos almal verwag – kan nog groter word!
Ek het die voorreg gehad om tyd met die Indiese span te spandeer terwyl hulle met net-sessies besig was en ek moet sê afrigter Gary Kirsten het sy spelers soveel inligting oor die Proteas en die verwagte speltoestande as moontlik gegee. ‘n Mens kan sien hy en sy span is honger om vir die eerste keer ooit ‘n toetsreeks op Suid-Afrikaanse bodem te wen.
Kirsten het baie oor die Suid-Afrikaanse kolfblaaie gepraat, veral oor die een op Centurion wat na verwagting meer wip en vaart sal oplewer as van die ander blaaie in die land.
Om dit teen te staan het hy gevra dat die opsigters by sy akademie in Constantia oefenblaaie voorberei wat min of meer soos die verwagte een op Centurion sal speel. Sachin Tendulkar en Rahul Dravid het reeds ‘n paar aflewerings op die lyf gevat, maar hulle sal reg wees vir die eerste toets.
In terme van die Proteas, het hulle verkies om bietjie langer te rus en meer sielkundige voorbereidings te doen. ‘n Groot kwelpunt vir Corrie van Zyl is die fiksheid van kaptein, Graeme Smith, wat steeds sukkel met ‘n gebreekte vinger. Die jongste nuus is dat Smith eers vandeesweek die groenlig sal kry mits hy sonder enige moeite deur die span se net-sessies kom.
Met Smith terug in die span, lyk Suid-Afrika na die beter span op papier. Smith en Alviro Petersen het hulle stempel afgedruk as een van die mees gedugte openingsvenootskappe tans in wêreldkrieket en hulle gaan die reeks teen Indië met groot selfvertroue in ná hul onlangse vertoning teen Pakistan. Hashim Amla is tans Suid-Afrika se beste speler en sy temprament en dissipline maak hom ‘n waardevolle speler. Jacques Kallis en AB de Villiers is pure klas en daar sal baie druk op hulle wees om seker te maak die Proteas teken ‘n trokvol lopies aan.
Die nommer ses kolfposisie is vir my een wat die keurders versigtig na moet kyk.
Ashwell Prince is deesdae ‘n toets-spesialis en het min verkeerd gedoen in die toetse teen Pakistan, maar ek glo JP Duminy sal baie meer waardevol daar wees. Duminy is tans op vorm en bied Smith ook met ‘n tweede draaiboul opsie. In my opinie sal dit baie beter vir die balans van die span wees.
In terme van die boulers is dit nou die tyd vir Dale Steyn om die spinnerakke af te stof en weer op volle vaart begin boul, terwyl Morné Morkel meer bestendig teen die Indiërs moet wees. As hulle twee volstoom inhardloop, kan dit ‘n lang toer vir die besoekers wees!
Ek voel ook Johan Botha het Paul Harris as die nommer een draaibouler in die land verbygesteek en behoort een van die eerste name op die spanlys vir die eerste toets te wees.
Indië het natuurlik ook groot spelbrekers soos die legendariese Tendulkar en Dravid sowel as Harbhajan Singh wie nou ook besef het dat hy so bietjie kan kolf ook. Voeg ‘n paar opkomende jong spelers soos Suresh Raina en Pragyan Ojha by dan lyk hulle net so goed op papier soos die Proteas.
Maar ons almal weet krieket word op gras en nie op papier gespeel nie.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
– Morné Esben is die sportaanbieder vir K-FM, Higveld Stereo, 702 Talk Radio en CapeTalk 567. Jy kan hom hier volg op Twitter.