Nuweland nie 'n goeie idee vir WP
2010-10-12 07:34
WP-ondersteuners sal Saterdag kliphard vir die Haaie moet skree in hulle halfeindstryd teen die Blou-Bulle in Durban, pleks van andersom.
Baie mense het al die hoop uitgespreek dat die Bulle die Haaie sal klop, en dat die WP op hulle beurt met die Cheetahs sal afreken om ‘n eindstryd op Nuweland af te dwing, maar ek’s nie 100 persent seker dit sal die beste opsie wees nie.
Die WP moet die Bulle probeer vermy.
Ek glo die WP het ‘n veel beter kans om die Haaie in Durban te klop as wat hulle het om die Bulle op Nuweland te klop. Met die ervaring wat die Bulle teruggekry het, is hulle nou ‘n heeltemal ander span. Die herintegrasie van Bakkies Botha, Victor Matfield, Flip van der Merwe en kie het beslis gewerk teen Griekwas en hulle sal net beter word hoe meer hulle speel.
Dié manne weet hoe om uitkloprugby te speel. ‘n Mens hoef net te kyk na die titels wat hulle die afgelope paar jaar gewen het.
En dis presies hoekom ek bekommerd is dat die Haaie dit miskien nie Saterdag sal kan maak nie. Maak nie saak hoe hard ek vir hulle skree nie, die Haaie is nie die soort span wat goed vaar in uitklopwedstryde nie. Hulle was verlede jaar ook die gunsteling, maar het teen die Cheetahs “gechoke”. Ongelukkig sal daardie stigma vir ‘n ruk lank met hulle bly ongeag hoe die afrigter en spelers dit aflag.
Hulle terugkerende Springbokke het ook nie verlede naweek te waffers teen die WP gelyk nie. Hulle Bok-voorry van Beast Mtawarira, Bismarck du Plessis en Jannie du Plessis moes klippe kou in die skrums teen ‘n vaste vyf wat nog nie een toets gespeel het nie. Dis nogal ‘n verleentheid.
Die Haaie sal waarskynlik spelers soos Jean Deysel en Willem Alberts terughê om die Bulle se verdediging te toets, maar ongelukkig het hulle net nie die ritme om hierdie Bulls-span te oorheers nie.
Dis seker nie goed om vooruit te praat nie want dis nie ‘n uitgemaakte saak dat die WP sy halfeindstryd teen die Cheetahs gaan wen nie. Die manne van Bloemfontein het ook ‘n gewoonte om hulle beste rugby vir die uitspeelrondes te hou, so dit gaan glad nie ‘n maklike wedstryd wees nie.
So goed soos die WP teen die Haaie was, is daar nog heelwat verbetering wat moet plaasvind. Die afrigter, Allister Coetzee, het ná Saterdagaand se wedstryd gebieg dat hulle geleenthede geskep het om nog ‘n paar drieë te druk. Hulle afronding was ‘n groot irritasie vir die toeskouers maar ‘n mens kon dit so half verwag het aangesien daar soveel veranderings aan die span was.
Francois Louw se spel op die grond en in algemene spel sal ook drasties moet verbeter. Hy lyk nie meer soos dieselfde speler sedert hy sy Bok-buiging gemaak het nie.
Hoe dit ookal sy, die WP lyk goed met hulle Springbokke terug en behoort te veel skietkrag vir die Cheetahs te hê. Maar dis die Curriebeker-halfeindronde en enigiets kan gebeur.
– Morné Esben is die sportaanbieder vir K-FM, Higveld Stereo, 702 Talk Radio en CapeTalk 567. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.