Moet Div in pad gesteek word?
2010-09-07 07:59
Die gesigte van Bok-ondersteuners Maandagoggend by die werk het ‘n storie vertel. Van my kollegas het maar net hul kop in skaamte laat sak, ander was woedend en wou hul Springbok-truie verbrand... maar die meerderheid het Peter de Villiers se kop geëis.
Volgens hulle moet die blaam vir die Bokke se vrot vertonings in vanjaar se Drienasie-reeks vierkantig voor sy deur geplaas word. Daar’s geldige redes hoekom hulle so voel.
Eerstens het die Drienasie-reeks bewys dat De Villiers se spankeuses nie die beste is nie. Op die tuis-been van die reeks (toe als reeds vir die Bokke verby was) moes De Villiers van sy jong spelers kans gegee het om speeltyd op hierdie vlak te kry met ‘n oog op volgende jaar se wêreldbeker.
Hulle sou sekerlik nie veel erger as die sogenaamde “eerste span” gewees het nie. Dit sou ook ‘n ideale geleentheid gewees het om sy senior spelers ‘n blaaskansie te gee en in ‘n maand lange kondisioneringsprogram te sit sodat hulle uitgerus en fiks kan wees vir Nieu-Seeland.
Die tweede ding wat baie opvallend was in my gesprekke met my kollegas was die feit dat De Villiers se woorde hom so gereeld in die sop laat beland het.
Sy kommentaar oor die Bees Roux-sage is net die jongste in ‘n hele string sêgoed wat liewers kon gebly het.
Maar is nóú regtig die tyd om De Villiers as Bokafrigter af te dank? Ek glo nie so nie. Dis waar dat hy die tou om sy eie nek geknoop het, maar om nou ‘n nuwe breier aan te stel kan miskien die Bokke meer skade doen as goed.
Buitendien, wie anders is daar wat bevoeg genoeg is om oor te neem?
Ek dink miskien sal dit wys wees om ‘n ou met Jake White se ervaring nader te roep wat miskien in ‘n adviserende hoedanigheid kan uithelp. Maar ek glo nie White se ego sal daarvoor gaan nie.
De Villiers se amptelike prestasieoorsig vind later die maand plaas en ek dink die beste wat daaruit kan kom is dat SARU se topbestuur vir De Villiers sê waarmee hulle en die res van Suid-Afrika ongelukkig is en waar hy en sy bestuurspan moet verbeter. Die senior spelers moet rus en daar moet ernstige aandag aan verdediging gegee word.
Ook, die spel verander elke jaar. Verlede jaar was die Bokke die pasaangeërs in wêreldrugby omdat hulle by die reëlveranderings aangepas het. Nou is dit die All Blacks wat in daardie opsig nommer een is. Die Bokke sal moet uitwerk wat die beste wedstryd-plan is en dit by die wêreldbeker uitvoer.
As De Villiers en kie aan die groot probleme in die Bokspan kan werk, sal die klein dingetjies hulself uitsorteer. Maar om nou die afrigter te pos sal nie ‘n slim idee wees nie.
– Morné Esben is die sportaanbieder vir K-FM, Higveld Stereo, 702 Talk Radio en CapeTalk 567. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.