Meyer steur hom nie aan klein rugbyspelers
2012-09-28 07:54
Een ding is nou maar so duidelik soos daglig – Heyneke Meyer steur hom nie te veel aan klein rugbyspelers nie.
Hy't dit tentoongestel met sy jongste spankeuse vir die kragmeting Saterdag teen die Wallabies op Loftus.
Eerstens, moet Meyer geloof word vir die moeilike besluit wat hy geneem het om Morné Steyn die trekpas te gee. Of dit nou heeltemal uit sy eie gedoen is, of hy onder druk geplaas was om dit te doen bly onbekend, maar dis beslis 'n stap in die regte rigting vir SA-rugby.
Johan Goosen neem die leisels oor op losskakel, maar 'n mens kan nie te veel van die jong man verwag nie, omdat hy nog baie groen op die hoogste vlak is. Maar hy's sonder twyfel steeds 'n beter keuse as Steyn.
Die keuse om Jaco Taute op senter te kies het my egter behoorlik laat kopkrap. Teen druktyd was dit nie 'n uitgemaakte saak dat Taute wel sy Bok-buiging in die nommer 13-trui sal maak nie, omdat Frans Steyn tot die laaste moontlike oomblik kans gegun sal word om sy fiksheid te bewys.
Indien Frans fiks is, sal Taute sy plek op die plaasvervangerbank inneem.
Wat egter vir my 'n raaisel is, is die behandeling van Juan de Jongh. Die Stormers-senter het in 2010 sy buiging vir die Bokke gemaak en het reeds 10 toetse gespeel. Hy was ook die kaptein, Jean de Villiers, se sentermaat tydens die Superrugby-toernooi, so dis logies dat hy dan volgende in lyn is indien daar 'n besering op senter is.
Maar Meyer stem nie saam nie. Nee wat, hy sal liewer 'n heelagter wat pas ná 'n lang besering teruggekom en net 'n handjievol Curriebeker-wedstryde gespeel het op senter kies pleks van 'n wedstrydfiks-spesialissenter wat reeds in die groen en goud uitgedraf het.
Vir my is die rede hiervoor duidelik. Meyer sal ten alle koste in sekere posisies 'n groter, sterker speler kies pleks van 'n kleiner speler met meer balvaardighede en beter voetwerk.
Watter boodskap stuur dit aan De Jongh uit?
De Jongh het nog altyd sy lojaliteit teenoor die WP, die Stormers en die Springbokke uitgespreek, maar ek sal nie verbaas wees as daar 'n paar gedagtes oor 'n moontlike skuif oorsee in sy kop ronddwaal nie.
– Morné Esben is ’n nuusleser vir 94.5 Kfm. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
