Liefde vir die spel tel niks meer
2013-02-18 07:34
Sedert ek kan onthou was ek in een of ander vorm deel van sport.
In my laer- en hoërskooldae het ek krieket, tennis en rugby gespeel en het ‘n verskydenheid sportsoorte by stadions of op die kassie gekyk. My eerste werk was as ‘n sportjoernalis en dis daar waar ek die mooi en lelike kant van sport leer ken het.
As kind was sport vir my oor die mededingendheid. Dit was oor vaardighede en om te kyk of jy beter as jou opponent is bloot danksy jou God-gegewe talent en die wil om te wen. Maar in die professionele era het ek geleer dat daardie wil om te wen soms te ver gaan.
Ek het ook verstaan dat geld een van die hoofredes is hoekom atlete en sportsterre soms op ‘n onwettige wyse sport speel.
‘n Paar weke gelede het die fietsry-held Lance Armstrong aan die TV-persoonlikheid Oprah Winfrey onthul hoe hy opkikkers gebruik het om die Tour de France te wen. Armstrong het aan haar gesê dat dit onmoontlik is om die fietstoer sonder die gebruik van opkikkers te wen. Talle ander Tour de France-wenners is reeds van hul titels gestroop nadat dit aan die lig gekom het dat hulle ook opkikkers gebruik het.
Marion Jones, die Amerikaanse naelloper, is nog ‘n hoë-profiel atleet wat verbode middels gebruik het. Sy moes tyd agter tralies deurbring nadat sy steroiede gebruik het om haar te help wen.
Wedstrydknoeiery is nog iets wat die gees van sport versuur het. Die eerste keer wat ek van wedstrydknoeiery gehoor het was toe die herrie rondom die wyle Proteas-krieketkaptein Hansie Cronje losgebars het. Daar was ook onlangs die storie waarin Pakistanse krieketspelers doelbewus foutballe geboul het tydens hul toer van Engeland. Drie spelers was tronkstraf daarvoor opgelê.
Die bedrogspul rondom die Indiese Premierliga-kriekettoernooi en sy president, Lalit Modi, het ook wêreldwyd nuushooftrekke gehaal.
Daar is talle ander voorbeelde van die gebruik van verbode middels en wedstrydknoeiery, maar wat ek probeer sê is dat dit nou amper “deel” van sport geword het.
Ons skrik nie meer wanneer ons van hierdie soort goed hoor nie. Selfs die skool- en amateurvlak – waar sport in sy ware vorm te siene behoort te wees – is nie meer skoon nie. Ons hoor jaar na jaar oor skoolseuns wat allerhande opkikkers gebruik sodat hulle deur die groot rugby-unies in die land opgeraap kan word.
Dit gaan nie meer oor die liefde vir die spel en om vaardighede teen mekaar op te weeg nie.
Vandag gaan sport oor wen ten alle koste... al is dit onwettig... en dis wat gaan veroorsaak dat sport sy gewildheid gaan verloor.
– Morné Esben is ’n nuusleser vir 94.5 Kfm. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
