Kings onregverdig behandel
2013-03-01 07:53
Is dit menslik om nie gelukkig te wees vir jou medemens of om nie te wil sien dat hulle goed doen en vooruitgang maak nie?
Ek weet nie, miskien is dit – want as ek so na al die berigte en blogs dié week oor die Southern Kings kyk, wil dit so voorkom.
Die Kings het verlede naweek hul heel eerste Superrugby-wedstryd gewen. Hulle het die Force 22-10 in die Baai geklop en die eerste nuwe span in die toernooi se geskiedenis geword om sy heel eerste wedstryd te wen. Die Rebels en die Force kon dit nie regkry nie. Dit spreek boekdele, maar steeds is daar diegene in die media en op sosiale netwerke wat die Kings om elke hoek en draai neerdruk.
Pleks daarvan dat joernaliste die Kings se vertoning op die speelveld dié week geprys het, het hulle eerder probeer beredeneer hoekom die Kings minstens een keer dié seisoen 'n honderd punte in 'n wedstryd sal afstaan.
Hulle het geskryf dat die Kings nie dieselfde intensiteit sal kan behou nie en dat hulle eenvoudig net nie goed genoeg is om op hierdie vlak mee te ding nie.
'n Ander joernalis het dit goedgedink om 'n storie te skryf oor iets wat reeds verlede week plaasgevind het, en wat boonop geen aanhalings bevat het nie. Die storie het gehandel oor wat die Kings-president, Cheeky Watson, blykbaar in die parlement aan die sport-portefeuljekomitee gesê het. Luidens die berig het Watson gesê hy's "skaam" oor die Kings se "wit" span – maar nêrens in die berig word Watson direk hieroor aangehaal nie.
Ek het na Watson se hele gesprek met die komitee geluister en hy het nooit hiervan melding gemaak nie. Wou die joernalis of koerant net moeilikheid maak? Wou hulle aandag van die Kings se sukses aftrek? En hoekom skryf hulle die berig byna 'n week nadat dit plaasgevind het?
Dis waarskynlik waar dat die Kings gaan sukkel om in vanjaar se toernooi oorwinnings te behaal en dis seker waar dat hulle 'n paar groot nederlae sal lei, maar elke nuwe span gaan in sy eerste jaar sukkel. So as hulle wel wen, moet ons dit aan hulle gun, veral omdat dit nie dikwels sal gebeur nie.
Ek dink ons moes dié week die Kings geluk gewens het met hul oorwinning en saam met hulle bly gewees het en ons moes ook Sergeal Petersen (wat twee drieë gedruk het) se eerste Superrugby-verskyning gevier het.
Maar nee, ons gun mos nooit iets aan enigiemand nie.
– Morné Esben is ’n nuusleser vir 94.5 Kfm. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
