Kings gunsteling teen die Force?
2013-02-22 09:05
Superrugby skop die naweek in al sy glorie af (dit het eintlik verlede week begin, maar die twee Aussie-derbies was so vervelig dat dit nie werklik tel nie!)
In terme van die Suid-Afrikaanse spanne kon die toernooi nie met 'n beter kragmeting afskop nie. Die Bulls is tuis teen die Stormers op Loftus en hoewel die Kapenaars nou daaraan gewoond geword het om in Pretoria te wen, sal Frans Ludeke se span glad nie maklik wees om te klop nie.
Die Bulls sukkel met beserings aan sleutelspelers, maar ondanks dié terugslae kon Ludeke steeds 'n Springbok-belaaide span kies vir die groot Noord-Suid-derby.
Die Stormers sal sonder die dienste van hul invloedryke kaptein Schalk Burger wees en sal ook die fisieke teenwoordigheid van die slot Eben Etzebeth mis. Maar nes Ludeke, kon Allister Coetzee ook 'n ster-belaaide vyftiental kies. Die voormalige Lions-spelers Elton Jantjies, Jaco Taute, Pat Cilliers en Martin Bezuidenhout gee die Stormers 'n baie meer afgeronde voorkoms.
Dit gaan 'n taai stryd wees, maar ek dink die Bulls sal net genoeg doen om die Stormers te stuit. Verwag 'n goeie stryd tussen die twee Springbok-losskakels Morné Steyn en Jantjies.
Die tweede wedstryd van die naweek waarna ek uitsien is die buiging van die Southern Kings teen die Western Force in die Baai. Ons is almal reeds bekend met hoe die Kings in Superrugby beland het en die emosie wat daarmee gepaard gaan is reeds op hierdie forum duidelik gemaak, maar ondanks die politiese sameswering en rugstekery is dit op die rugbyveld waar dinge interessant gaan wees.
Die Kings-afrigter het dieselfde begin-vyftiental gekies wat 'n week of wat gelede teen die Griekwas verloor het. Dis eintlik 'n skande dat 'n span wat Superrugby speel teen 'n provinsiale span in die stof gebyt het. Een spankeuse wat my laat regop sit het, was die weglating uit die beginvyftiental van die Nieu-Seelandse veelsydige agterspeler, Hadleigh Parkes.
Die voormalige Blues speler moes in my opinie die nommer-15 of -13 trui gedra het. As jy die nuwe span in 'n toernooi is, kan jy nie bekostig om nie met jou beste spelers te begin nie.
Daar gaan nie 'n beter kans wees vir die Kings om 'n Superrugby-wedstryd te wen as Saterdagaand teen die Force nie. Die Force was maar die afgelope seisoen vrotterig en het reeds verlede naweek teen die Rebels vasgeval. Kom ons hoop vir die land se onthalwe die Kings kan die knoop deurhaak en nie naweek na naweek op die rugbyveld geslag word nie.
– Morné Esben is ’n nuusleser vir 94.5 Kfm. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
