IPL móét beste ooit wees
2010-03-09 08:36
Organiseerders van vanjaar se Indiese Premierliga beter hoop dat die krieket gedurende die toernooi die beste ooit is.
Die IPL skop dié naweek af maar al wat ons tot dusvêr oor die toernooi gehoor het is hoe bang die Aussies, Suid-Afrikaners en spelers van ander lande is om in Indië te gaan speel.
Daar was selfs sprake dat die Aussies die toernooi sou boikot.
Die Proteas-kaptein, Graeme Smith, was ook nie optimisties om daar te speel nie, nadat daar dreigemente teen die toernooi gemaak is.
Die legende Shane Warne het op Twitter gesê dat hy self twee keer sal dink voor hy hom by die Rajasthan Royals sal aansluit, maar het dit sommer gou weer teruggetrek en gesê hoe lief hy vir Indië is.
Lalit Modi het seker ‘n paar woorde in sy oor gefluister, iets in die lyn van “… jy kan van jou wen-bonus vergeet as jy aanhou om hierdie twak oor my toernooi te praat… “
Daar word tans te min oor die krieket en te veel oor die sekuriteit gesê in die aanloop tot die IPL, wat eintlik teleurstellend is. Die voormalige Proteas-afrigter, Eric Simons, is as die Delhi Daredevils se boul-afrigter ingespan maar was daar iets hieroor gesê? Nie juis nie.
Wat’s nuut in vanjaar se IPL? Wie is die groot aanspraakmakers vir die titel? Kan die Deccan Chargers dit weer doen?
Nuus soos hierdie word daar nie oor geskryf nie maar ons lees amper daagliks oor wie wat te sê het oor die veiligheids-situasie in Indië.
Vir die toeskouers en krieketliefhebbers is dit belangrik dat die krieket skouspelagtig is, want sal dit almal laat vergeet dat daar wel ‘n veiligheidsrisiko was. Dit sal ook goed wees vir die toekoms van die toernooi, maar Modi en sy span sal eenvoudig baie vroeër met die veiligheidsowerhede moet gesels om seker te maak dat al die spelers veilig is en dat daar planne in plek is vir enigiets wat moontlik skeef kan loop.
As dit nie gebeur nie, sal al die geld in die wêreld nie die toernooi tot sy aanvanklike glorie herstel nie.
As dit als in orde is, sal die media nie ‘n ander keuse hê as om net op die krieket te fokus nie.
– Morné Esben is die sportaanbieder vir K-FM, Higveld Stereo, 702 Talk Radio en CapeTalk 567.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.