Groot verwagtinge vir sport in 2013
2012-12-14 07:15
Soos 2012 ten einde loop, is dit tyd om oor die hoogte- en laagtepunte van die jaar te besin, en ek het besluit om my laaste twee rubrieke van die jaar te gebruik om terug te kyk na die sportjaar wat agter die rug is.
Dié week wil ek eers kyk waarheen sport in Suid-Afrika op pad is, voordat ek my toptien-sportoomblike van 2012 kies.
Kom ons begin by rugby. Heyneke Meyer is vanjaar aangestel om die Bokke te lei en ek is seker almal sal saamstem dat 2012 vir Suid-Afrikaanse rugby wisselvallig en soms uiters teleurstellend was. Meyer het onder groot kritiek deurgeloop oor die Bok-span se spelpatroon en sy spankeuses en in 2013 sal hy weer onder die vergrootglas geplaas word.
My hoop is dat Meyer se volgende bou-blok die Bokke se aanval is, want dis op die aanval waar hulle veral swak gevaar het. In 2012 was sy fokus om 'n groep spelers te ontwikkel en om 'n soliede verdedigingspatroon in te stel. Tot 'n mate het hy daarin geslaag, maar nou moet die Bokke begin drieë druk om toeskouers weer lus te gee om die span te ondersteun.
Op die krieketveld loop dinge baie meer vlot. Die Proteas is tans die wêreld se beste toetskrieketspan en wen deesdae meer eendagwedstryde as wat hulle verloor.
'n Effense swart merkie is die Proteas se T20-vertonings. Ons moet net terugkyk na die onlangse T20-wêreldbeker om te besef dat ons nog ver van die beste in hierdie formaat is.
Dit blyk of Gary Kirsten saamstem. Hy't sy hulpafrigter, Russell Domingo, opdrag gegee om nuwe lewe in die T20-span te blaas en dis presies wat hy gedoen het met die insluiting van spelers soos Quinton de Kock, Henry Davids en Aaron Phangiso vir die komende reeks teen Nieu-Seeland.
Kirsten het besef dat Suid-Afrika 'n spesialis T20-span nodig het om in hierdie weergawe van die spel suksesvol te wees. So in 2013 sien ek uit na groot dinge van hierdie span.
En dan, Bafana Bafana. Suid-Afrika was nooit 'n wêreldmag in sokker nie en dit sal waarskynlik nie binne die volgende paar jaar gebeur nie, maar die aanstelling van Gordon Igesund is 'n positiewe een. Hoewel die span se uitslae sedert hy oorgeneem het, nie watwonders was nie, glo ek hy't die vermoë om Bafana Bafana weer 'n gedugte span in Afrika te maak.
Nes die wêreldbeker in 2010, hoop ek dat die Afrikanasiesbeker, wat volgende jaar in Suid-Afrika plaasvind, die span sal aanspoor om hul beste te lewer. Bafana, in 2013 staan ek agter jou.
– Morné Esben is ’n nuusleser vir 94.5 Kfm. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
