Faf moet voortbou op skittervertoning

2012-11-30 07:15

Faf du Plessis is die nuwe held in Suid-Afrikaanse krieket ná sy skittervertoning in sy debuut-toets teen Australië verlede week.

Ek kan my nie indink dat hy nie 'n permanente plek in die toetsspan sal hê nie.

Deesdae is dit bitter moeilik om by die Suid-Afrikaanse toetsspan in te breek omdat daar eenvoudig soveel groot name is.

Kallis, Smith, De Villiers, Amla, Steyn, Philander en Morkel is name wat jy so te sê in elke Proteas-toetsspan sal sien en as gevolg daarvan is daar slegs 'n paar posisies waaroor daar onsekerheid heers.

Dis wat Du Plessis se vertoning so spesiaal maak. Hy's nie 'n klassieke toetsspeler nie en tegnies gesproke is hy nie die topspeler nie, maar wat hom die voordeel oor ander jong spelers gee is sy geestestoestand. Sy konsentrasievermoë was in die tweede toets teen Australië soms ongelooflik en hy't als wat die Aussies in sy rigting gegooi het, absorbeer.

Nog groot pluspunte vir Du Plessis is dat hy 'n draaiboul-opsie is en dat hy een van Suid-Afrika se bobaas veldwerkers is.

So wie se plek sal Du Plessis op 'n meer permanente basis kan volstaan? Alviro Petersen en JP Duminy (voor sy besering) speel ook oor die afgelope seisoen of twee goeie krieket, so hulle plekke is redelik veilig, maar een speler wie se toetsloopbaan in gedrang is, is Jacques Rudolph.

Rudolph het nie tot dusver in Australië enige noemenswaardige bydrae gelewer nie en kon slegs een keer in die 16 toetse sedert sy terugkeer na toetskrieket 'n honderdtal aanteken.

Nog 'n teleurstellende toets sal amper verseker dat Rudolph nie gou weer 'n toets vir Suid-Afrika sal speel nie.

Ek hou van Rudolph. Ek dink hy's tegnies baie goed en lyk na 'n soliede toetsspeler, maar in 'n Suid-Afrikaanse top-orde waar spelers soos Amla en Kallis gereeld groot lopies aanteken, word 'n speler wat nie so goed vertoon nie onder die vergrootglas geplaas.

Hy's ongelukkig tans sonder twyfel die swakste skakel in die Suid-Afrikaanse kolforde.

Vir Du Plessis is die groot toets nou om voort te bou op sy vertoning in die tweede toets om te bewys dat hy wel sy plek in die span verdien en nie slegs as 'n plaasvervanger speel nie.

Die derde en laaste toets van die Proteas se Australiese toer begin vandag en sal tot die vierde Desember voortduur – dis nou as die toets oor al vyf dae sal strek.
 
 – Morné Esben is ’n nuusleser vir 94.5 Kfm. Jy kan hom hier volg op Twitter.

Stuur jou kommentaar aan Morné

Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.