Dié keer kan WP wen
2012-10-19 11:25
Dis daai tyd van die jaar waar Kaapse-rugbyondersteuners so effe senuweeagtig word.
Die Curriebeker-halfeindstryde vind die naweek plaas en die Westelike Provinsie kom teen die verdedigende kampioen, die Leeus, te staan.
Dis algemene kennis dat die WP-rugbyunie nie 'n enkele senior trofee in 11 jaar gewen het nie en oor die laaste paar jaar het hulle gereeld die uitspeelwedstryde in die Curriebeker sowel as Superrugby gehaal.
Die probleem is egter dat hulle altyd tydens hierdie fase vasval. Dis juis hoekom Saterdag se kragmeting op Ellis Park so 'n naelbyt-affêre gaan wees.
Het die WP die vermoë om dié jaar daardie trofeedroogte te breek?
Baie mense het my hieroor op Twitter gepols en my antwoord was dat hulle beslis die vermoë en talent het om dit te doen.
Hulle het 'n Bok-belaaide span met spelers soos Bryan Habana, Juan de Jongh, Eben Etzebeth en dies meer – spelers wat die teleurstelling van 'n Superrugby-nederlaag nog goed kan onthou.
Hulle het ook verlede naweek teen die Vrystaat gewys dat dié beslis nie dieselfde WP-span is wat die toernooi begin het nie.
Die verlies van kaptein Jean de Villiers en die staatmaker-haker Tiaan Liebenberg sal beslis gevoel word, maar hulle plaasvervangers, Marcel Brache en Skarra Ntubeni, het die seisoen gewys dat hulle heel gemaklik op dié vlak is.
Die enigste struikelblok vir die WP sal hul geestestoestand wees.
Het hulle die selfvertroue om die teleurstelling van die afgelope paar jaar agter hulle te sit en om uiteindelik tot hul volle vermoë te speel.
Teen Saterdagaand seweuur sal ons die antwoord weet.
– Morné Esben is ’n nuusleser vir 94.5 Kfm. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
