Bulls, Sharks verras dalk dié naweek
2012-07-20 07:25
As daar twee spanne is vir wie jy niks van uitspeel-wedstryde kan vertel nie, is dit die Bulls en die Crusaders.
Dié twee spanne is van die mees suksesvolle in Superrugby-geskiedenis en hulle pak mekaar Saterdagoggend in Christchurch. Die Crusaders het die titel al sewe keer gewen terwyl die Bulls drie keer koning gekraai het.
Terwyl niemand die gehalte van die Bulls-span kan onderskat nie, speel die manne van Pretoria op die oomblik nie juis wafferse rugby nie en Morné Steyn se skopvoet bly 'n probleem.
As 'n mens kyk na die Bulls se suksesse oor die jare, het dit baie afgehang van 'n goeie grondslag voorlangs en Steyn se dodelike skopvoet. Maar hulle domineer nie meer voorlangs nie en Steyn mis deesdae meer as wat hy oorskop.
Wat ook nie in die Bulls se guns tel nie is dat hulle lanklaas in Christchurch gewen het. 'n Mens moet teruggaan na 1997, toe die Bulls laas die Crusaders in Christchurch ore aangesit het! Die Bulls het ook nooit 'n uitspeelwedstryd buite Suid-Afrika gewen nie. Hoe belangrik gaan dit vir hulle geestestoestand wees?
Maar, soos die Engelsman sê, "History means nothing!"
In Brisbane pak die Sharks die Reds vir 'n plek in die halfeindronde.
Dis 'n interessante een hierdie.
Ek dink die punteverskil in die wedstryd sal vreeslik knap wees. Die Reds gaan sonder die charismatiese losskakel Quade Cooper wees, wat geskors is, en dit sal natuurlik tot 'n skommeling in die agterlyn lei. Die onervare Ben Lucas sal die nommer-10-trui oorneem.
Maar die Sharks sal ook sonder die invloedryke Francois Steyn wees. Die Bok-senter was op goeie vorm vir die Sharks teen die Bulls en die Cheetahs en het baie goed met die jong Tim Whitehead gekombineer. Pat Lambie is ook weens 'n besering nie beskikbaar nie.
So daar is bittermin om tussen die twee spanne te kies. As ek wel my geld op iemand moet sit, sal dit egter die Sharks wees, omdat hulle reeds die Reds vroeër vanjaar geklop het.
– Morné Esben is ’n nuusleser vir 94.5 Kfm. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
