Boucher se uittrede groot verlies, maar...
2012-07-13 07:50
Mark Verdon Boucher was sonder twyfel een van Suid-Afrikaanse krieket se blinkste sterre.
Hy't 999 internasionale slagoffers platgetrek – 'n rekord wat nie sommer verbygesteek sal word nie. Hy't ook meer as 10 000 lopies in sy internasionale loopbaan aangeteken. Iemand van sy kaliber sal 'n mens nie sommer weer kry nie.
Boucher het dié week sy uittrede uit internationale krieket aangekondig na 'n fratsongeluk tydens 'n opwarmingswedstryd in Engeland. 'n Balkie het opgeskiet en sy oog getref, waarna hy 'n noodoperasie moes ondergaan. Hy't in 'n verklaring gesê dat hy weens die erns van sy besering nie meer vir die Proteas kan speel nie.
Wat nou vir die Proteas?
Wel, die Lions-paaltjiewagter Thami Tsolekile is op pad Engeland toe as Boucher se amptelike plaasvervanger, hoewel daar 'n skraal kans is dat hy wel speelkans sal kry. AB de Villiers sal in die eerste toets, wat volgende Donderdag by die Oval begin, die paaltjiewagterwerk waarneem en sal dit waarskynlik vir die res van die toer volhou. Baie mense het Tsolekile se insluiting bevraagteken en gesê ander spelers, soos die Cobras se Dane Vilas en die Dolphins se Darryn Smit, sou beter opsies gewees het.
Tsolekile is egter deur Krieket Suid-Afrika gekontrakteer en dis niks minder as reg om hom as plaasvervanger op te roep nie. Hy is immers die SA "A"-span se paaltjiewagter. Of hy wel speelkans sal kry, is 'n ander vraag.
Met AB de Villiers agter die paaltjies gee dit vir afrigter Gary Kirsten 'n bietjie meer vryheid om 'n spesialis-kolwer of veelsydige speler in die span te sit. 'n Speler soos JP Duminy, wat die afgelope seisoen in goeie vorm met die kolf was, kan uiteindelik sy kans kry om sy plek in die Proteas-toetsspan te vestig. Duminy bied Kirsten ook 'n ekstra boul-opsie, wat handig in Engelse toestande kan wees. Om die waarheid te sê, dis waarskynlik beter vir Suid-Afrika omdat Boucher nie juis die afgelope tyd sy beste spelpeil met die kolf getoon het nie.
In sy laaste drie toetse het Boucher tellings van 46*, 24 en 34* aangeteken.
Boucher sal beslis 'n groot verlies vir Suid-Afrikaanse krieket wees, maar miskien is dit net die noodlot se manier om die Proteas weer bo aan die internasionale toetsranglys te help kry.
– Morné Esben is ’n nuusleser vir 94.5 Kfm. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
