Bokke benodig X-faktor vir Rugbykampioenskap
2012-08-17 09:30
Ná twee weke van opwindende aksie by die Olimpiese Spele in Londen, is dit nou weer tyd vir meer tradisionele sport om sy plek in die kollig te neem.
Dit voel soos 'n ewigheid sedert Manchester City die Engelse Premierliga-sokker gewen het. Dieselfde geld vir Orlando Pirates wat die plaaslike sokker kampioenskap verower het, maar dis nou iets van die verlede. Die nuwe sokkerseisoen is onderweg en ek kan nie wag nie!
Maar dis nie al waaroor ek opgewonde is nie. Internasionale rugby is weer die naweek op die kassie met die Rugbykampioenskap wat op Nuweland afskop. Ons sal weer ‘n kans kry om te sien of Heyneke Meyer se Springbokke al ‘n nuwe identiteit en wedstrydplan ontwikkel het, ‘n plan wat hopelik weer vir Suid-Afrika in die toernooi sal laat seëvier.
Ek het reeds my kommer oor die Bokke en spesifiek oor Morné Steyn se spelpeil op hierdie platform gelug, so ek sal dit nie weer doen nie, maar dit sal interessant wees om te sien presies hoe en waar Meyer sy spelers sal inspan.
Meyer het in die toetsreeks teen Engeland spelers gekies wat hy geken het, spelers wat bekend is met hoe hy te werke gaan, hoofsaaklik omdat hy bittermin tyd gehad het om voor te berei. Vir die Rugbykampioenskap het hy grotendeels dieselfde groep gekies.
Terwyl baie Bok-ondersteuners glo dat Meyer se groep ietwat blou lyk, kan ‘n mens nie juis met sy spankeuse stry nie. Die span wat hy Saterdag op die veld sit behoort maklik genoeg koning te kraai.
Die Bokke se wedstrydplan het teen die Engelse so bietjie van ‘n X-faktor gemis en was soms vreeslik vervelig. Maar, soos ek vroeër gesê het, jy kan nie juis met die uitkoms daarvan stry nie.
Nou dat hy so 'n bietjie meer tyd met sy span gehad het, kan ‘n mens net hoop dat Suid-Afrika 'n bietjie meer opwindend op die aanval sal wees en dat hulle ‘n nuwe identiteit aan die toeskouers bekendstel.
Die pak voorspelers sal beslis ‘n groot rol speel in hierdie nuwe, opwindende benadering. As hulle nie voorlangs die grondslag kan lê nie, sal dit maar bitter moeilik vir ouens soos Frans Steyn en Bryan Habana wees om enigsins aanvalle te loods.
So gepraat van die agterlyn, dit lyk asof daar ‘n opwindende spankeuse op die regtervleuel kan wees. JP Pietersen het sy duim in die Superrugby-eindstryd beseer en speel nie in Saterdag se toets nie, so Pietersen se spanmaat, Lwazi Mvovo, sal die nommer 14 trui teen die Poemas sal dra.
Indien die voorspelers hul werk doen en Steyn weer sy beste vorm herwin, glo ek sonder twyfel dat die Bokke se agterlyn die drieë teen Argentinië sal inryg en hopelik aangaan om die All Blacks behoorlik om vanjaar se titel die stryd aan te sê.
– Morné Esben is ’n nuusleser vir 94.5 Kfm. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
