Basta met bohaai oor ras in krieket
2013-01-11 07:58
Krieket Suid-Afrika moet sy huis in orde kry, want die organisasie is die enkele grootste bedreiging vir die sukses van die nasionale span.
Ek sien die groot koppe by KSA dink nou daaraan om die kwota-stelsel weer in te stel omdat daar glo nie genoeg etniese swart spelers in die span is nie. Dis natuurlik suur druiwe nadat Thami Tsolekile vanjaar nie in 'n enkele toets gespeel het nie, ondanks die feit dat hy deur KSA gekontrakteer was.
Dis waar dat daar beloftes aan Tsolekile gemaak is en dis waar dat daardie beloftes nie nagekom is nie, maar om skielik vir die terugkeur van die kwota-stelsel te vra is miskien effe oordrewe.
Die Proteas het oor die afgelope 18 maande bloed gesweet om sukses te behaal en om die wêreld se toptoetskrieketspan te word. Om nou die kwota-stelsel terug te bring sal absoluut waansinnig wees en sal waarskynlik al die span se harde werk ongedaan maak.
Die kwota-stelsel sal nie werk nie en behoort nie in sport nie!
Krieket Suid-Afrika moet liewer hul tyd en hulpbronne gebruik om die spel in agtergeblewe gebiede te ontwikkel om seker te maak dat meer swart spelers op provinsiale vlak deurbreek. Dit sal dan verseker dat hulle in aanmerking vir die Proteas sal kom.
Ek glo die nasionale span moet op meriete gekies word. As 'n wit speler beter as 'n swart speler is, moet die wit speler gekies word. Dieselfde geld as 'n swart speler beter as 'n wit speler is. 'n Afrigter moet nie onder onnodige druk geplaas word om spelers van seker rassegroepe te kies net om die administrateurs of politici tevrede te stel nie. Sy taak is om die beste elf spelers, ongeag hul velkleur, op die speelveld te kry.
Ek kyk nou al sedert ek kan onthou sport en ek weet hoe lekker dit voel as my nasionale spanne wen. Na die oorwinning gee ek nie om hoeveel wit, swart of bruin spelers in die beginspan was nie want aan die einde van die dag is dit Suid-Afrikaners wat op die speelveld meeding.
Die verlede kan ons nie vergeet nie, maar ek dink dis nou tyd vir ons om verby velkleur te kyk en om mekaar as Suid-Afrikaners te beskou. Sodra dit gebeur, sal daar 'n positiewe ommeswaai in die land plaasvind.
– Morné Esben is ’n nuusleser vir 94.5 Kfm. Jy kan hom hier volg op Twitter.
Stuur jou kommentaar aan Morné
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
