Werkloosheidstoelaag net nog 'n manier om stemme te wen

2012-12-28 07:56

Ek het myself aan die begin van die jaar in 'n baie ongemaklike posisie bevind. Ek was iemand wat vir die eerste keer ’n werk moes soek.

Vir die eerste paar maande het dit maar broekskeur gegaan. Al het ek ’n graad en ’n honneursgraad gehad en seker gemaak dat ek soveel as moontlik van my skryfwerk gepubliseer kry, was dit nie genoeg om iemand te oortuig om vir my ’n werk aan te bied nie.

Ek het wel so ’n paar rand verdien deur ’n internskap by ’n tydskrif. Dit was nie genoeg om enigiets mee te doen nie, maar genoeg om die slawerny die moeite werd te maak.

Ek was in hierdie tyd van my ouers afhanklik vir kos, klere, behuising, alles. Ek weet nie wie tussen my en hulle die gelukkigste was toe ek uiteindelik na vyf maande se soek ’n werk gekry het nie.

Nou die dag lees ek dat die ANC van plan is om vir die arme ander mensies, wat nog nie ’n joppie gekry het nie, elke maand so ’n paar rand in die hand te stop. Blykbaar om seker te maak dat hulle nie moed opgee nie en nie gedwing word om hulself deur misdaad aan die lewe te hou nie.

Hierdie beleid dien vir my, soos meeste van die ANC se ander blink idees, as ’n bewys dat geen logiese denkvaardighede uitgeput word wanneer hulle oplossings vir belangrike probleme probeer vind nie.

Die werkloosheidstoelaag gaan belastingbetalers (wie anders) jaarliks R30 miljard kos. ’n Rapsie minder as die enorme R35 miljard wat jaarliks op kindertoelae bestee word. En soos meeste toelae in ons liewe lawwe land behandel dit die simptome en nie die oorsaak van die kwaal nie.

Jong mense wat vir die eerste keer ’n werk soek, het gewoonlik ’n gebrek of tekort aan twee dinge wat noodsaaklik in die werkplek is: Opleiding en ondervinding. Dít is die kwessies wat volgens my die ANC se aandag behoort te geniet.

Opleiding is natuurlik iets wat deur onderwys voorsien word, maar dit is ’n storie vir ’n ander dag. Ondervinding kan egter maklik opgedoen word deur die grootste vloekwoord onder jong werkendes – ’n internskap.

In meeste internskappe doen jy werk wat benede ’n donkie is en kry nie ’n enkele blykie van waardering daarvoor nie. Maar ek gee eerder geld vir iemand wat bewys dat hy bereid is om te leer en te werk as iemand wat heeldag op die sypaadjie sit en wag vir beter dae. Die administratiewe uitdaging wat onvermydelik die ANC in die gesig gaan staar is dan ook kleiner, aangesien die werkgewer ’n handjie kan bysit.

Wat misdaad betref, is ek ook nie oortuig. Ek is seker nie alle armoede verwante misdade word gepleeg om iemand aan die lewe te hou nie, tensy iemand se lewe van die teenwoordigheid van ’n luukse televisie afhang. Dit is vir my meer belangrik dat die ANC die disrespek vir die wet wat in ons land heers en ons patetiese polisiëring aanspreek. Die opknapping van wetstoepassing is nog ’n belegging waarvoor my belastinggeld gerus gebruik kan word. Hopelik word dit reeds daarvoor aangewend.

Nog ’n basiese ekonomiese beginsel wat oorweeg moet word, is die ekonomiese groeikoers. Danksy die onlangse stakings beweeg dit teen ’n slakkepas en nie teen die 3,5% wat die werkloosheistoelaag beleid noodsaak nie. Boonop word die ekonomie deur die bevolking in terme van groei verbygesteek. Indien ons land se bevolking aanhou groei teen ’n koers wat die ekonomie nie kan byhou nie, sal ons nooit ’n punt bereik waar ons genoeg werk vir almal het nie.

Die werkloosheistoelaag beleid  lyk vir my soos net nog ’n skelm manier vir die ANC om stemme te wen by die mense vir wie hulle lank gelede werk belowe het en nou net R450 elke maand kan gee. Dit beklemtoon ook die feit dat die ANC van 10% van ons bevolking verwag om die hele land te onderhou. Ek hoop van harte dat die ANC nie nog ’n bodemlose put gaan skep om swaarverdiende belastinggeld in te smyt nie.

Stuur jou kommentaar aan Michelle

Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.