Sosio-ekonomiese tydbom tik voort
2012-11-15 07:00
Armoede in ons land is nie net iets waarvan jy in die koerant lees nie.
Dit sit bakhand voor die ingang by ’n winkel. Dit staar vir jou met dooie oë by ’n verkeerslig. Dit strompel doelloos langs paaie rond. Dit smeek jou om elke hoek en draai vir ’n paar rand om ’n brood vir die honger kinders by die huis te koop.
Dit is dan vir my verstommend dat ons president glo die gaping tussen die ryk en arm is besig om te krimp.
Jacob Zuma het hierdie uitlating onlangs tydens die opening van die nasionale huis van tradisionele leiers gemaak. Die rede vir sy opvatting maak dit vir my duidelik dat hy eintlik nie verstaan wat die inkomstegaping behels nie.
Volgens Zuma kry meer mense as ooit tevore nou toelaes van die staat – daarom is die inkomstegaping besig om te krimp. Verder het die president gesê die regering voorsien huise, elektrisiteit en wie weet wat nog aan dié wat op die regering se liefdadigheid staatmaak om aan die lewe te bly.
Daar is ’n enorme aantal ekonomiese beginsels wat Zuma totaal ignoreer.
Toelaes beteken nie dat armes nou ’n inkomste verdien nie. Dit beteken dat belastingbetalers, waarvan daar nie baie in hierdie land is nie, se bydrae gebruik word om kos op iemand anders se tafel te sit. Toelaes impliseer verder die afwesigheid van ’n inkomste wat die gevolgtrekking van ’n krimpende inkomstegaping nog meer onwaarskynlik maak.
Huise en elektrisiteit het te doen met die regering se vermoë om dienste te lewer. Dit word weereens deur belastingbetalers geborg en het geen invloed op die gaping tussen ryk en arm nie. Dit gee mense aan die onderkant van die finansiële leer die kans om nader aan dieselfde lewenstandaard as diegene bo-aan die leer te kom. En te oordeel aan die gereelde optogte wat spruit uit ondoeltreffende dienslewering behoort die president homself nie op die skouer te klop daaroor nie.
Die belangrikste aspek wat die president ignoreer, is dat ’n land se ekonomie nie kan floreer as die inwoners van die land deur die staat aan die lewe gehou moet word nie. Die doel met ’n land se ekonomie is nie net dat elkeen ’n stukkie van die ekonomiese koek moet kry nie, maar dat die koek danksy die bydraes van almal moet groei.
Dit is natuurlik vir die president en die meeste van sy ministers moeilik om te aanvaar dat daar nog so baie armes in die land is. Tog sal daar na raming meer as R200 miljoen op opknappings by Zuma se huis in Nkandla spandeer word. Daar is onlangs berig dat miljarde rande op van sy ministers se huise spandeer is. Niemand in die regering ry met iets anders as luukse Duitse motors nie. Ja, Zuma het sedert sy verkiesing as president ’n klomp mense se lewens verbeter. Ongelukkig is hulle almal deel van sy regering en was hulle nie arm om mee te begin nie. Danksy sy baantjies-vir-boeties-beleid sal hulle seker ook nooit wees nie.
Dit is moeilik om te verstaan hoe minder bevoorregte mense in ons land lewe as jy soos ons president ontken dat ons met ’n ekonomiese tydbom sit.
Die feit bly staan dat ’n land nie ekonomies voorspoedig kan wees tensy daar nie volhoubare oplossings vir sosio-ekonomiese probleme gevind word nie.
Armoede is ’n werklikheid. Een wat nie opgelos kan word deur die armes kunsmatig aan die gang te hou met toelaes nie.
Langtermyn oplossings soos werkskepping is die ware oplossing. Mense moet leer om vir hulself ’n vis te kan vang en moet dan die geleentheid gebied word om dit te doen.
– Michelle van der Spuy is 'n inhoudsvervaardiger vir News24 Nigeria.
Stuur jou kommentaar aan Michelle
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
