'n Sinnelose Amerikaanse tradisie?
2012-11-07 08:30
Verlede week, terwyl ek ewe onskuldig 'n aand alleen by die huis deurbring, verras 'n klop aan die deur my.
'n Klomp kinders in heksehoede, met kloue en allerhande dinge wat veronderstel is om 'n mens bang te maak, begroet my toe ek die deur oopmaak.
"Trick or treat!"
Natuurlik het dié kinders nie besef nie dat dit net Morné Steyn se huidige spelpeil en kykNET se nuwe musiekkanaal is wat my enigsins bang maak. En dat ek ook nie juis lekkergoed opstapel vir Halloween nie.
Vir die eerste keer in my 29 lewensjare het ek egter besef dat Halloween nou ook aktief in Suid-Afrika (of ten minste dele daarvan) gevier word.
Of jy nou dink dat dit die fees van die duiwel is, of jy dit getrou beoefen en of dit sommer net iets is wat jy vir die pret doen is nie werklik ter sake nie. Almal moet myns insiens maar self die grense stel van wat vir hulle aanvaarbaar of nie aanvaarbaar is nie – hoewel dit seker vir ouers met skoolgaande kinders makliker gesê as gedaan is.
Vir my as Suid-Afrikaner is dit egter 'n relatief sinnelose Amerikaanse gebruik (al het dit nie sy oorsprong in die VSA nie) en ek verstaan nie aldag waarom ons dit ook moet vier nie.
Natuurlik is dit, soos baie van dié soort goed, iets waaruit winkelgroepe en televisiekanale munt slaan. In die laaste week van Oktober kan jy omtrent nie in 'n Woolworths instap sonder om oogbal- of vlermuistand-lekkers te sien nie. Daar is dan natuurlik ook 'n groot verskeidenheid gruwelflieks wat op baie van die Multichoice-kanale uitgesaai word.
Wanneer jy 'n Halloween-plakker op 'n produk plak verkoop dit blykbaar outomaties – en die grootbase wil natuurlik meer produkte verkoop.
Iets soos Halloween bly vir my net nog 'n manier om die kommersiële Amerikaanse kultuur op die wêreld af te dwing. So word ons eie tradisies ook vertroebel – of jy nou 'n Duitser, Australiër of Suid-Afrikaner is.
Dit is waarom 'n mens trots moet wees op jou land, jou taal en jou kultuur, ongeag van wie jy is. Dit is ook waarom jy ander mense moet waardeer en respekteer vir wie hulle is.
Die feit van die saak is dat die wêreld ons vandag toenemend dwing om ons eie nasionale identiteite te vergeet, en besig is om ons in 'n klomp Amerikaners te verander.
Solank hulle net al hulle natuurrampe, en natuurlik Nicky Minaj, vir hulself hou...
– Malherbe Pelser is 'n professionele fotograaf. Hy is mal oor mense, sport, musiek en reis. Jy kan hom hier volg op Twitter, sy webblad besoek by www.malherbepelser.com of saam met hom kuier op Facebook.
Stuur jou kommentaar aan Malherbe
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
