'n Kuier saam met Chad, Cameron... en Mr Bean
2012-08-01 08:00
Die afgelope paar dae het weereens bewys waarom die Olimpiese Spele een van die grootste hoogtepunte op die sportkalender is.
As iemand wat self twee jaar van my lewe in Londen gewoon het, het ek sommer vroeg al geweet dat ek hierdie Olimpiese Spele meer gaan geniet as enige van die laaste paar jaar – veral toe Mr Bean Vrydagaand op die skerm verskyn!
Die openingseremonie was soms 'n bietjie deurmekaar en ander oomblikke baie goed. Ek moet erken dat ek gesukkel het om wakker te bly om die hele ding te volg, maar ten spyte van die feit dat dit soms gevoel het asof ek iewers op die Lord of the Rings-stel verlore was, het ek dit geniet.
Al wat ek wonder is hoekom hulle nie ook 'n bietjie van hulle chavs en rioters ingewerk het in die vertoning nie. Dit sou definitief die skare aan die brand gesteek het.
Daar is darem niks lekkerder as om na werk by die huis te kom en op Supersport Blitz op datum te kom met die dag se uitslae nie – net om daarna tussen die sporte op die verskillende kanale te wissel.
Daar is letterlik amper elke soort soort sport denkbaar om te kyk, wat beteken 'n mens kan behoorlik kies waarvoor jy lus is.
Ek skryf natuurlik hierdie week se rubriek kort nadat Chad le Clos goud gewen het in die 200 m-vlinderslag. Dit volg kort op die hakke van Cameron van der Burgh se goud in die 100 m-borsslag. Wat 'n ongelooflike paar dae vir Suid-Afrikaanse swem en sport! As oomblikke soos hierdie nie jou patriotiese hartsnare gaan roer nie, weet ek nie wat gaan nie.
As hierdie twee medaljes die hoogtepunt van die Suid-Afrikaanse span se Spele is kan ons met trots terugkyk op ons vertoning. Soos dinge tans staan lê ons bo Groot Brittanje en Australië op die punteleêr, en dit is nie te versmaai nie.
As 'n mens 'n bietjie wegkyk van die sporte waarin Suid-Afrikaners deelneem is daar natuurlik ook baie interessante en snaakse dinge aan die gang.
Die fout wat begaan is in die vrouesokker om die Suid-Koreanse vlag vir die Noord-Koreane te vertoon word alleenlik oortref deur die verkeerde nasionale lied vanuit die Borat-fliek wat 'n paar jaar gelede vir 'n atleet van Kazakhstan by 'n toernooi in Koeweit gespeel is.
Dan is een van die mees fasinerende dinge ongetwyfeld die gewigoptellers se bobene. Dit lyk behoorlik soos vuurpyle en ek is die heeltyd bang dat hulle gaan opstyg. Nog 'n raaisel is of hierdie ouens inderdaad eersteklas vlieg – want hulle sal sekerlik nie in die ekonomieseklas-sitplekke pas nie.
Dit is eintlik 'n jammerte dat 'n mens nie meer gereeld dié klas van kompetisie kan geniet nie, maar dit is definitief ook 'n goeie ding. Die vier jaar wag is elke keer die moeite werd.
Kom ons hoop dat die tweede week net so genotvol soos die eerste is!
– Malherbe Pelser is 'n professionele fotograaf. Hy is mal oor mense, sport, musiek en reis. Jy kan hom hier volg op Twitter, sy webblad besoek by www.malherbepelser.com of saam met hom kuier op Facebook.
Stuur jou kommentaar aan Malherbe
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
