Wees geduldig op die paaie
2012-12-19 09:34
Die somervakansie in Suid-Afrika is tans in volle swang met 'n groot hoeveelheid Suid-Afrikaners reeds op vakansie en nog vele wat die lang pad moet aandurf voor Kersfees en Nuwejaar voordat hulle terugkeer huis en werk toe.
Groot hoeveelhede mense ry in hul eie voertuie na bestemmings regoor die land tog is 'n selfs groter hoeveelheid afhanklik daarvan om met taxi's en busse aangery te word om tyd met hulle families te spandeer.
Die gebrek aan ’n ordentlike en betroubare treinstelsel wat mense op grootmaat kan vervoer en die koste van busoperateurs, dryf baie mense wat die hele jaar weg van die huis is in 'n hoek om staat te maak op voertuie wat oorlaai is en dan gewoonlik nog ook 'n waentjie sleep wat vol gepak is met tasse.
As iemand wat self in die buiteland weg van my gesin gewoon het, besef ek die waarde van familietyd en die behoefte om by mens se geliefdes te wees. Waar ek byvoorbeeld kon bekostig om vir die Kerstydperk terug te vlieg Suid-Afrika toe besef ek egter hoe sleg dit moet wees om in dieselfde land as jou familie te woon, maar nie dit te kan bekostig om hulle gereeld te sien nie of om gemaklike en veilige vervoer te kan bekostig nie.
Die aard en kompeterendheid tussen taxi-bestuurders en groepe beteken dat meeste van die bestuurders 'n hele klomp ritte tussen byvoorbeeld Kaapstad en die Oos-Kaap sal maak in die spasie van 'n week. Moegheid en haastigheid lei dan tot oordeelsfoute wat in ongelukke ontaard.
Baie bestuurders in hulle eie voertuie jaag ook teen 'n hoë spoed om by hul bestemming uit te kom en dit is meestal die onvermoë om geduldig te wees met die verbysteek van voertuie wat lei tot ongelukke.
Die naweek het my vrou en ek 'n hele ruk lank met die N1 van Kaapstad noord gery en ek het telling verloor van hoeveel keer ek verbygesteek is om draaie teen 'n hoë spoed deur beide taxi's en voertuie soos BMW X5'e.
Die dodetal in Desember tot op hede het hierdie week gestyg tot net onder die 700 mense. Die amptelike syfers sal eers aan die einde van die maand aangekondig word en kan nog drasties hoër word.
Dit is elkeen van ons se verantwoordelikheid om nie te bestuur wanneer ons moeg is nie en om nie haastig te wees om by ons bestemmings uit te kom nie.
Indien mens dit verontagsaam stel jy nie net jou en jou eie familie se lewe in gevaar nie, maar so ook die van ander.
Mag ons almal dit onthou en toepas op die paaie oor hierdie tydperk.
– Malherbe Pelser is 'n professionele fotograaf. Hy is mal oor mense, sport, musiek en reis. Jy kan hom hier volg op Twitter, sy webblad besoek by www.malherbepelser.com of saam met hom kuier op Facebook.
Stuur jou kommentaar aan Malherbe
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
