Waarheen nou vir top-spanne?
2012-10-31 08:44
So het die plaaslike rugbyseisoen ook nou die afgelope naweek tot 'n einde gekom en 'n mens kan nie anders begin as om vir die Westelike Provinsie en hulle ondersteuners geluk te wens nie.
Dit kon nie 'n maklike 11 jaar gewees het nie en hulle verdien elke oomblik van feesvier.
Met die begin van 'n seisoen kan die media telkens net nie ophou gons oor die Sharks nie. Hoe meer daar gegons word, hoe meer weet ek dat ek nie 'n flenter omgee vir die manne in swart en wit nie.
As Bul-ondersteuner is 'n mens seker tradisioneel veronderstel om meer van 'n afkeer in die WP te hê, maar as feitlik al jou skoonmense hulle ondersteun en jy self in die Moederstad woon, laat dit jou nie met veel van 'n keuse nie.
Maar ja, ek voel oor die Sharks soos wat ek oor Kwazulu-Natal se goor, taai, hittige weer voel – glad nie te goed nie.
Toe ek op laerskool was en die Bulle so 'n bietjie gesukkel het, was almal ewe skielik Sharks-ondersteuners, ondanks die feit dat die meeste van my klasmaats nog nooit náby Durban en omgewing gekom het nie. Dit was my eerste kennismaking met mense wat hulle lojaliteit verander na gelang van wie suksesvol is.
Terug na die WP: Dit is werklik 'n ongelooflike prestasie om teen alle verwagtinge in Durban, na soveel jare van mislukking, uiteindelik weer die Curriebeker te wen.
Al hou ek nie van die Sharks nie, kan 'n mens nie ontken dat hulle 'n ongelooflike goeie span is nie, en die WP het werklik alles gegee om hulle te klop.
Om trofees te wen is 'n gewoonte, en oor die afgelope jare het die WP en Stormers elke keer na aan glorie gekom – net om by die wenstreep plat te val. Hierdie oorwinning sal 'n wesenlike gewig van die Kapenaars se skouers afhaal en dit kan werklik die begin van groot dinge oor die volgende klompie jare vir hulle wees.
Die uitdaging vir die ander spanne sal nou wees om hulleself op te lig en volgende jaar opnuut met mag en mening 'n terugkeer te maak.
Die Sharks kan hulle gaan blinkvryf vir die voor- en sportblaaie sodat hulle opnuut opgehemel kan word. Hulle kan tog nie weer misluk nie, of hoe?
In Pretoria sal die groot probleem wees hoe gou die nuwe generasie spelers hulle kan vestig om die skadu van vorige legendes af te skud. As daar nie uit die tekortkominge van 2012 geleer word nie, kan daar nog 'n hele klompie jare voortgesukkel word.
Die Vrystaters sal aanhou om almal se tweede gunsteling-span te wees en sal hopelik die vernedering van 'n uitspeelwedstryd in die Curriebeker met die Kings gespaar word.
Die Leeus het 'n interessante seisoen voor hulle, met die beste van hulle spelers wat reeds hul tasse gepak het, en hulle mag dalk met die terugkeer na Superrugby net so 'n bietjie sukkel.
Genadiglik vir die Leeus kan 'n mens nie verskrikllik optimisties raak oor die Kings se vooruitsigte nie. Dit is nog nie eers 2013 nie en ek kry hulle sommer al by voorbaat jammer.
'n Mens voel amper of jy vir iemand solank moet begin jammer sê vir wat gaan gebeur. Of sal dit sommer cheeky wees?
– Malherbe Pelser is 'n professionele fotograaf. Hy is mal oor mense, sport, musiek en reis. Jy kan hom hier volg op Twitter, sy webblad besoek by www.malherbepelser.com of saam met hom kuier op Facebook.
Stuur jou kommentaar aan Malherbe
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
