Oor vrees, verdeeldheid en leuens

2012-11-21 08:52

Liefde wen. Die waarheid sal seëvier.

Hierdie is uitdrukkings wat met enige mens se hart resoneer. Of ten minste wat 'n mens met jou hart wíl laat resoneer. Dit is iets wat ek met alles in my wíl glo – al is dit nie altyd maklik nie.

Tog is daar diegene in ons reënboognasie wat dié ideologieë omkeer en misbruik om hulle eie politieke agendas te bevorder.

Opvoeding, 'n beter verstandhouding tussen al ons mense en 'n bietjie genade is al wat gaan help om 'n einde te bring aan die "koue oorlog" wat tans in ons land aan die gang is.

As 'n mens spesifiek na die plaaswerkerstaking kyk, sou dit byvoorbeeld 'n groot verskil gemaak het as diegene wat staak (ongeag van of hulle werklik plaaswerkers is, of bloot buitestaanders wat met busse aangery is) geweet het dat dit nie die boere self is wat die minimum loon bepaal nie. Dit sou ook gehelp het as hulle daarvan bewus was dat buitelandse mededinging ons boere reeds dwing om kostes tot die minimum te beperk, en dat boerdery as 'n bedryf deesdae nie juis vir jou sakke en sakke vol goud beteken soos dit dalk vir sommige in die verlede was nie.

In werklikheid is daar vandag bitter min plase in ons land wat 'n goeie hoeveelheid geld maak.

Die feit dat plase en toerusting gebrand en vernietig word, het natuurlik net 'n groter impak op plase se winsgewendheid. As boere dan nog die salarisse van hulle werkers verdubbel sal dié plase of moet sluit, of die helfte van hulle arbeidsmag moet afdank.

Ongelukkig is dit egter altyd makliker om die vinger na iemand anders te wys as om self verantwoordelikheid te neem, om te sorg dat mense behoorlik ingelig is, en om jou kant te bring in besprekings oor minimum lone.

Dit lei eindelik tot die huidige situasie: 'n gevoel van vrees en haat van die werknemers jeens die boere; terwyl die boere op hulle beurt soms vir hulle lewens vrees.

As ons mense nie gaan leer om mekaar te verstaan en so 'n bietjie in mekaar se skoene te loop nie, sal ons nooit leer om mekaar lief te hê nie.

Die faktor van leuens en oneerlikheid dra egter ook by tot die huidige atmosfeer in die land.

As die media sê daar is geen verband op die president se woning in Nkandla nie, en dat dit met belastingbetalers se geld betaal word, hoef die regering bloot die septer te swaai en te sê dit is nie waar nie. Enigiemand wat 'n koerant kan lees wéét mos dit is 'n loutere spul onsin.

As dinge gewerk het soos in Pinocchio, het 'n paar mense in hierdie land sonder twyfel belaglike lang neuse gehad.

Tog is daar honderde duisende mense in ons land wat die mediadekking oor die saak as 'n regse komplot beskou en skerp reageer omdat die media durf om ons president te bevraagteken.

In so 'n samelewing is feite nie werklik van belang nie.

Boonop het Cosatu en Passop Dinsdag 'n verklaring uitgereik waarin hulle die vinger wys na boere, en húlle vir die plaaswerkerstakings blameer.

"Ons is geskok dat die plaaseienaars in De Doorns... vandag ernstige pogings aangewend het om anargie, xenofobie en gewelddadige verdeeldheid onder die gemeenskap van werkers te veroorsaak," het die twee groepe in 'n gesamentlike verklaring gesê.

Kan jy jou dit verbeel? Om watter rede sou boere verdeeldheid probeer veroorsaak en sodoende hulle eie plase, inkomste en dorpe – sowel as die inkomste van hul eie werkers – op die spel plaas?

Nee wat. Voortaan sal ek maar moet "Passop" en elke tikkie inligting wat uit die mond van 'n lid van die regerende party of groepe soos Cosatu kom, met 'n reuse-knip sout neem.

'n Mens kan maar net hoop dat die waarheid en liefde weer sal seëvier soos dit hoort, en dat diegene wat werklik agter die verdeeldheid en geweld sit, tot verantwoording geroep sal word.

 – Malherbe Pelser is 'n professionele fotograaf. Hy is mal oor mense, sport, musiek en reis. Jy kan hom hier volg op Twitter, sy webblad besoek by www.malherbepelser.com of saam met hom kuier op Facebook.

Stuur jou kommentaar aan Malherbe

Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.