Mangaung 'n keerpunt vir ANC

2012-12-12 08:12

Eerskomende Sondag begin die ANC se langverwagte verkiesingskongres in Mangaung.

Mangaung is natuurlik Sesotho vir "Plek van die jagluiperd,"vir diegene wat nie weet nie.

Die fokus van die kongres sal val op die leierskap van die party – dit is immers 'n verkiesingskongres. Dis egter jammer dat die klem op hierdie spesifieke tyd in ons land se geskiedenis op leiers val, en nie op leierskap self nie.

Amper 70% van die provinsies het Jacob Zuma as hul kandidaat benoem en tensy iets vreemds gebeur sal Zuma vir 'n tweede termyn verkies word.

Intussen is ons land se onderwysstelsel in 'n totale chaos en armoede is besig om soos 'n veldbrand te versprei. Dít terwyl ons regeerders hulle eie sakke volstop en oordadig luuks lewe.

Dit is werklik om van naar te raak.

Ek is ten gunste van 'n verskuiwing in leierskap, maar nie net om iemand nuuts in te bring nie.

Indien Kgalema Motlanthe wel die leisels van die ANC oorneem, sou hy dan ook werklik moet lei. As 'n mens nie verskille sien in hoe ons land regeer word nie, maak 'n verandering in leierskap immers nie sin nie.

As Zuma egter 'n tweede termyn kry, sal hy en sy kamerade werklik moet begin om hulle te bemoei met die lot van die jeug en die volgende generasie, wat veral ly onder hulle wanbestuur en traak-my-nie-agtige houding. Tog hou ek nie my asem op daarvoor nie.

Die regering het soos 'n kind geword wat met enige teëspoed die vinger na iemand anders wys en dan verwag dat daar nie verdere vrae daaroor sal wees nie.

Ten spyte van soveel pogings deur verskillende leiers blyk daar grootskaalse verdeeldheid in die ANC te wees. Dit laat 'n mens wonder of die kamerade ooit hulle sake in orde sal kry sodat hulle daarop kan fokus om die land te bestuur.

In 'n land met soveel kwessies en vraagstukke is dit nou broodnodig dat die regerende party hom in Mangaung bemoei met werklike oplossings en 'n padkaart vir die vooruitgang van die land.

Laat ons maar net hoop dat die soeke na 'n leier nie lei tot verdere insinking in leierskap nie.

 – Malherbe Pelser is 'n professionele fotograaf. Hy is mal oor mense, sport, musiek en reis. Jy kan hom hier volg op Twitter, sy webblad besoek by www.malherbepelser.com of saam met hom kuier op Facebook.

Stuur jou kommentaar aan Malherbe

Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.