Maak sélf die verskil
2013-01-02 10:26
So vaar ons toe nou 2013 met sjampanje en vuurwerke in!
Ten spyte van bekommernisse oor die wêreldekonomie, sowel as ons eie land se unieke probleme, sal die meeste mense tien teen een uitsien na die nuwe jaar met nuwe hoop.
Ons het mos in elk geval die hele 2012-is-die-einde-van-die-wêreld-ding oorleef sonder enige drama.
Jy moet egter 'n baie groot pessimis wees as jy kronies glo dat dinge in jou persoonlike lewe en jou omgewing nie sal begin omkeer in hierdie jaar nie. Ek glo dit is 'n kern-deel van mense se harte – om te kan hoop en glo dat daar iets beters op pad is. As 'n mens net glo dat dinge al hoe slegter gaan word sal die wêreld 'n baie donker plek wees.
'n Hele paar mense het die afgelope week op Facebook gesê hoe bly hulle is dat 2012 verby is, en dat dit nie 'n goeie jaar was nie.
Dié soort uitlating hang seker van 'n mens se persoonlike ervarings gedurende die jaar af. Vir my was dit nie noodwendig 'n uitstaan-jaar nie, maar 'n mens is dankbaar vir jou eie gesondheid en die tyd met geliefdes en familie.
Ek is dankbaar vir die sëen wat ek beleef deur die mense rondom my en ook die geleentheid om te probeer om 'n verskil in hulle lewens en die lewens van ander te maak.
Miskien is dit ons opdrag vir die nuwe (en elke) jaar – om self te probeer om die verskil te maak in die lewens rondom ons. In 'n land waar daar baie tekortkom in ons sosiale sfeer moet 'n mens sovêr as wat moontlik is self die verskil maak waar ander dit nie doen nie.
Die einde van selfgesentreerdheid en omgee vir ander is die enigste manier wat Suid Afrikaners in die nuwe jaar ook 'n duik gaan maak in die probleme en kwessies wat ons almal raak en kwel. Ek het nie juis altyd die blinkste idees nie - maar ek dink eenvoudige goed soos om bloed te skenk, ou klere vir 'n klerebank te gee, nie dronk agter die stuur van 'n motor te klim nie en om meer geduldig met mekaar te wees is 'n maklike begin.
Die alternatief – om terug te sit en te hoop dat die wêreld self gaan verander is nie 'n opsie nie.
Ek wens almal 'n geseënde en voorspoedige 2013 toe!
– Malherbe Pelser is 'n professionele fotograaf. Hy is mal oor mense, sport, musiek en reis. Jy kan hom hier volg op Twitter, sy webblad besoek by www.malherbepelser.com of saam met hom kuier op Facebook.
Stuur jou kommentaar aan Malherbe
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
