Verskille gee verhoudings skop
2012-11-12 08:17
Ek onthou my laaste dag op Potchefstroom baie goed.
Die trane het behoorlik geloop toe ek my beste vriendin, Liza, finaal moes groet. Ons het nie geweet wat om vir mekaar te sê nie. Daar was letterlik geen woorde om ons fantastiese studentejare saam te beskryf nie.
Ek onthou hoe ek toe vier jaar se herinneringe in bokse moes pak, die laaste stukkie prestick van die muur moes afhaal en hoe PUK FM vir oulaas al sukkelend in my kamer opgevang het. My hele lewe wat ek toe geken het, moes in my karretjie geprop word en die sowat 700 km na KwaZulu-Natal oorleef.
Maar wat ek die beste onthou, is hoe die elektriese nagmerrie wat vir my in my kamer gewag het, ‘n titseltjie komiese verligting op hierdie hartseer dag gebring het.
My pa het hierdie... wat sal ons dit nou noem... gawe (?) om elektriese goedere op ‘n kreatiewe (?) wyse lewe te gee.
Ja, my yskas, mikrogolf, CD-speler, elektriese kombers, toaster en studeerlampie was almal aanmekaar gekoppel en het na één... enkele... kragprop gelei. My pa het dit só geïnstalleer toe hy my aanvanklik kom help intrek het.
Daardie dag moes ek elke toestel se drade individueel afknip om die items van mekaar los te maak, sodat dit makliker getrek kon word. Die arme siel wat my yskas by my gekoop het, was seker baie verras toe hy sien sy nuwe item het nie eers ‘n kragprop nie; net ‘n kort kragdraad wat by die onderkant uitsteek.
My pa doen hierdie nou al jare lank. Dis sy kenmerkende styl wanneer dit by elektriese sake kom.
My ouers het onlangs hul kombuis ‘n bietjie laat opknap. Een van daai fancy extractor fans was deel van die nuwe bykomstighede waarmee die vertrek sou spog.
Die kombuis is later klaar opgekikker en dis tyd dat ek en my sussie ‘n bietjie gaan kuier. Die oggend ná ons aankoms, begin Elize vroeg aan die gil raak. “My kamer ruik soos gekookte hoender!”
My pa se geheime oplossing vir dié waaier, was dat al die reuke sommer in my suster se kamer, wat reg bo die kombuis is, sy extracting-werk doen! Die reuk van die hoender-en-rys-affêre wat ons huishulp die oggend vir ons bedorwe honde gekook het, het toe lekker in my suster se kamer gaan hang.
So, ja, dis nie vreemd om te hoor dat jy nie ‘n kamer se lugverkoeling kan aanskakel nie, want dan werk die buitelig, toaster of swembad-pomp nie. O, moet ook nie daai haardroër te lank gebruik nie, anders gaan die hele huis se krag af. Natuurlik sit ek nou ‘n bietjie aan, maar dit is nou al ‘n running joke in ons huishouding... my pa maak “hot connections.”
Toe laat dit my dink... Hierdie obskure verbindings is eintlik baie soos die verhoudings wat ons met geliefdes en ander het.
Ons het almal mekaar nodig om aan die lewe te bly, al pas ons nie regtig by mekaar nie. Een mens is die raserige grassnyer; die ander een die versorgende elektriese kombers, terwyl die unieke een die creepy crawly en die ander een die gesondheidsbehepte smoothie-masjien is.
Ons verstaan mekaar nie altyd nie, maar probeer hard om verdraagsaam teenoor almal se verskille en behoeftes te wees. Soms werk ons mooi saam en kan nie sonder die ander een bestaan nie; ander kere vryf ons mekaar lelik op, wat dan tot ‘n mini ontploffing kan lei.
So, wees lief vir mekaar en omhels daai verskille. Dis waar ware elektrisiteit vandaan kom.
– Liezl Temmingh is ‘n joernalis vir Nuus24. Jy kan haar hier volg op Twitter.
Stuur jou kommentaar aan Liezl
Neem kennis: Nuus24 is ten gunste van vryheid van spraak en 'n diversiteit van sienings. Die opinies van rubriekskrywers wat op Nuus24 gepubliseer word is hul eie, en verteenwoordig nie noodwendig die sienings van Nuus24 nie.
